सुनसरी : अमेच्योर गल्फर २१ वर्षीय शुक्रबहादुर राईले शुक्रबार सूर्य नेपाल इस्टर्न ओपन गल्फ टोर्नामेन्टमा नेपालका नम्बर एक गल्फर शिवराम श्रेष्ठलाई समेत पछि पार्दै प्रोफेशनल र अमेच्योर दुवैतर्फको ट्रफी जीते ।
तर उनी अमेच्योर भएकै कारण नगद पुरस्कार पाउन सकेनन् । उनै शुक्रबहादुरले शनिबार घर उपहार पाएका छन् । नाजुक आर्थिक अवस्थाका उनलाई धरान, काठमाडौंदेखि बेलायत, सिंगापुर, हङकङ लगायत नेपाली गल्फरहरुले घर बनाएर दिएका हुन् ।
शनिबार घर अगाडि नै कार्यक्रम आयोजना गरी गल्फरहरुले उनलाई घरको साँचो हस्तान्तरण गर्दा शुक्रबहादुर निक्कै खुसी देखिए । उनले खुसी व्यक्त गर्दै भने, ‘रहरले खेल्न थालेको गल्फकै कारण घर उपहार पाएँ । अब यसमै निरन्तर लागेर देशको नाम राख्ने छु ।’
धरान–१९ का शुक्रबहादुर राई सानैदेखि गल्फ खेल्न रुचि राख्थे । त्यसै पनि गल्फलाई धनाढ्यको खेल भनिन्छ । शुक्रलाई आमाले छाडेर हिँडिन् । बावु ज्याला मजदुरी गर्छन् । उनलाई गल्फर बन्न सजिलो थिएन । घर नजिकै गल्फकोर्ष थियो ।
शुक्र गल्फ खेलाडीको बल टिप्ने र झोला बोक्ने सहयोगी (ब्याडी ब्वाई) बनेर कोर्षमा छिरेका थिए । सन् २०१० बाट गल्फकोर्ष छिरेका शुक्र चार वर्षपछि आफैँ अब्बल खेलाडी बने ।
शुक्रको धरान–१९ मा रहेको सानो जग्गामा काठको चुहिने घर थियो । त्यो पनि भत्किएपछि उनको परिवार पाल टाँगेरै सुत्नुपथ्र्यो । कहिले त खुल्ला ठाउँमै खाना पकाएर खान्थे । उनको आर्थिक अवस्था र गल्फमा गरिरहेको प्रगतिबारे केही समयअघि एपीवान टेलिभिजनले ३ मिनेट ५० सेकेन्डको भिडियो प्रशारण समेत गरेको थियो । त्यसपछि देश–विदेशबाट उनलाई सहयोग प्राप्त हुन थाल्यो ।
शुक्रको घर निर्माणमा गल्फरहरु पनि सक्रियतापूवर्क लागेका थिए । उनीहरुले देशविदेशबाट ८ लाख ८२ हजार संकलन गरेका थिए । त्यसमध्ये करिब ८ लाख खर्चेर घर बनाइएको हो ।
तर अझै पनि घरका कोठामा सुत्ने फर्निचर छैन । भुईँमै सुत्ने गरेका छन् । शुक्रबहादुरले जीतेका दर्जनौं ट्रफी र प्रमाणपत्र कोठाभित्र सानो खाटमा राखिएका छन् ।शनिबार उनलाई घर हस्तान्तरण गर्ने कार्यक्रममा उपस्थित विपी कोइराला स्वास्थ्य विज्ञान प्रतिष्ठानका उपकुलपतिले उनको अवस्था देखेर तुरन्तै २० हजार सहयोग गरे ।
कार्यक्रममा उपस्थित गल्फर तेजबहादुर राईले ५० हजार दिए । शुक्रबहादुरका बुवा लक्ष्मण राई भन्छन्, ‘मैले छोरालाई गल्फ नखेल, पैसा कमाउन विदेश जा भनेर कर गरेँ तर मानेन । आज गल्फ खेलेरै घर बनाउन सक्यो । अब यसलाई खेलमै लाग्न सहयोग गर्छु ।’
नेपाल गल्फ एसोसिएसनका केन्द्रीय उपाध्यक्ष तिलक राई शुक्रको घरमा अपुग भएका फर्निचरहरुको व्यवस्था गर्न पनि सहयोग जुटाउने र उनको खेलमा सहयोग गर्ने बताउँछन् ।
नेपाल प्रोफेशनल गल्फर्स एसोसिएसनका केन्द्रीय महासचिव दीपक आचार्य भन्छन्, ‘छोटो समयमा शुक्रको प्रगति देख्दा उसले कुनै दिन अन्तर्राष्ट्रियस्तरसम्म पुग्न सक्छ भन्ने आशा गरेका छौँ । उसलाई गल्फमै लाग्न सहयोग गर्ने छौँ ।’
प्रतिक्रिया दिनुहोस !
