विराटनगर : जबर्जस्ती करणी र बहुविवाह मुद्दामा दोषी ठहर भएका दुई व्यक्तिलाई प्रहरीले मोरङको पथरीशनिश्चरेबाट पक्राउ गरेको छ ।
अदालत र प्रहरीको सूचीमा फरार रहेका अभियुक्त २८ वर्षीय राजेश धिमाल र ४५ वर्षीय धनपति राई पक्राउ परेका हुन् । पथरीननिश्चरे नगरपालिका–२ का धिमालविरुद्ध जबर्जस्ती करणीको मुद्दा छ भने पथरीननिश्चरे–३ का राईले बहुविवाह गरेका हुन् ।
दुई वर्षअघि उनीहरु अदालतबाट दोषी ठहर भइ प्रहरीको नजरमा फरार थिए । फैसलाको दुई वर्षपछि मात्रै प्रहरीले उनीहरुलाई आफ्नै गाउँबाट पक्राउ गरेको हो । इलाका प्रहरी कार्यालय पथरीका प्रहरी निरीक्षक कमल बजगाईँका अनुसार दुवैजना लुकिछिपी आफ्नै घर र गाउँमै बस्दै गरेको गोप्य सूचनाका आधारमा पक्राउ परेका हुन् ।
प्रहरीले दुवैजनालाई पक्राउ गरी अदालतमा बुझाएपछि जेल सजाय भुक्तानका लागि कारागार चलान गरिएको बताइएको छ । मोरङको पथरीशनिश्चरेबाट एक साताकै अवधिमा १३ जना फरार प्रतिवादीलाई प्रहरीले पक्राउ गरेको छ । विभिन्न मुद्दामा अदालतले दोषी ठहर गरे पनि फरार रहेकालाई पक्राउ गरिएको प्रहरी निरीक्षक बजगाईँले बताए ।
बहुविवाह, लागूऔषध, बन, सवारी ज्यान, सार्वजनिक अपराध र जवरजस्ती करणी मुद्दाका फरार अभियुक्तहरुलाई पक्राउ गरिएको हो ।
प्रतिक्रिया दिनुहोस !
