इलाम : सरकारले सम्झौता कार्यान्वयन नगरको भन्दै बुधबार अनशन सुरु गरेका डा. गोविन्द केसीका पक्षमा स्थानीयले पनि समर्थन जनाएका छन् ।
इलाममा बिहीबार दिउँसो स्थानीय महिलाले मौन र्याली निकालेर डा. केसीको पक्षमा समर्थन जनाएका हुन् । अनशनको दोस्रो दिन इलाम नगरपालिकामा महिलाले निकालेको मौन र्यालीमा महिला अधिकारकर्मीको उल्लेख्य सहभागिता थियो ।
र्याली अनशनस्थल इलाम नगरपालिकाको फुलगाछीबाट ठूलो टुँडीखेल, नविनचोक, मालापथ हुँदै पुनः चोक बजारमा आएर सम्पन्न भएको थियो ।
र्यालीपछिको कोणसभालाई सम्बोधन गर्दै महिला अगुवा विष्णु दाहालले सरकार अधिनायकवादी भएको भन्दै आक्रोश पोखिन् । ‘सरकार केही नसुन्ने केही नदेख्ने भएको छ', उनले भनिन्, 'यसलाई जनपक्षीय बनाउनु पर्छ ।’
केसीले गरिब, निमुखा जनताको पक्षमा लडेकाले आफूहरु पनि उनको समर्थनमा पुगेको उनको भनाइ थियो । केसीले सम्झौता विपरित शिक्षा तथा स्वास्थ्य समितिले चिकित्सा शिक्षा विधेयक संसद्मा पठाएको भन्दै बुधबार अपरान्ह ५ बजेबाट इलाममा अनशन सुरु गरेका हुन् ।
उनले ६ बुँदे माग अघि सार्दै देशमा कायम रहेको भद्रगोल, अराजकता र दण्डहीनताको जिम्मेवारी प्रधानमन्त्री केपी शर्मा ओलीले लिनुपर्ने बताए । केसीले १५ औं अनशनका क्रममा २०७५ साउन १० गते नेपाल सरकारसँग भएको सम्झौता बमोजिम अक्षरशः संशोधन गरेर अविलम्ब चिकित्सा शिक्षा विधेयक संसदबाट पारित गर्न माग गरेका छन् ।
प्रतिक्रिया दिनुहोस !
