अन्तर्राष्ट्रिय ब्याडमिन्टनमा प्रिन्स दाहाललाई दोहोरो उपाधी
पुष २८, २०७५ शनिबार १४:१९:०
विराटनगर : ब्याडमिन्टन खेलाडी प्रिन्स दाहालले राष्ट्रपति कप जुनियर अन्तर्राष्ट्रिय ब्याडमिन्टन प्रतियोगितामा दोहोरो जित हात पार्दै उपाधी जितेका छन् ।
प्रिन्स यू–१९ र यू–१५ दुबैतर्फ विजयी भएका हुन् । फाइलनमा यू–१९ मा उच्च बरियताका प्रफुल महर्जनलाई २१–८ र २१–१० ले पराजित गर्दै उनले उपाधी रक्षा गरे । यस्तै यू–१५ मा उनले म्यानमारका ज लिन थुलाई २१–१५, १७–२१, २१–९ ले पराजित गर्दै दोहोरो उपाधी उचालेका हुन् ।
मोरङ जिल्ला ब्याडमिन्टन संघको आयोजनामा विराटनगरमा शुक्रबार सम्पन्न प्रतियोगिताको महिला यू–१९ मा उच्च वरियताकी जेशिका गुरुङले रशिला महर्जनलाई २४ –२२, २१– १४ ले पाखा लगाउँदै उपाधी जितिन् ।
यस्तै उनले रशिलासँग मिलेर यू–१९ गल्र्स जोडीतर्फ पनि उपाधी हात पारिन् । जेशिका र रशिलाको जोडीले सीमा राजवंशी र निता लम्साललाई २१–१२, २१–३ ले पाखा लगाए ।
सहिद रंगशालास्थित कभर्डहलमा भएको प्रतियोगिताको यू–१९ पुरुष युगल तर्फको खेलमा म्यानमारका ज लिन थु र थु रिनको जोडीले प्रफुल महर्जन र रुकेश महर्जनको जोडी माथि १९ । २१, २१ । १८ र २१ । १७ को जित निकाल्दै उपाधी कब्जा गरे ।
यू–१५ गल्र्सतर्फको खेलमा उच्च वरियताकी रशिला महर्जनले स्मृति राईलाई २१–७, २१–३ ले पराजित गर्दै उपाधी हात पारिन् । विजयी शीर्ष तीन स्थान हात पार्ने खेलाडीहरुले क्रमशः नगद २० हजार, १० हजार र ५ हजार नगद सहित ट्रफी र प्रमाणपत्र प्राप्त गरेका छन् । विजयी खेलाडीहरुलाई विराटनगर नगरपालिकाका मेयर भीम पराजुली लगायतले पुरस्कार वितरण गरेका हुन् ।
प्रतिक्रिया दिनुहोस !
