डा. केसीलाई काठमाडौं पठाइयो
इलाम : सत्याग्रही डा. गोविन्द केसीलाई काठमाडौं पठाइएको छ । चिकित्सा शिक्षा सुधारको माग राखी ९ दिनदेखि इलाममा अनशनरत केसीको स्वास्थ्य नाजुक भएपछि मध्यराति १०ः३० मा बीपी कोइराला स्वास्थ्य विज्ञान प्रतिष्ठानको एम्बुलेन्समा काठमाडौं पठाउन झापा लगिएको हो ।
केसीलाई काठमाडौं पठाउन पूर्वप्रधानन्यायधिस सुशीला कार्की, चिकित्सा शिक्षासम्बन्धी राष्ट्रिय नीति तर्जुमा उच्चस्तरीय कार्यदल संयोजक तथा त्रिविका पूर्वउपकुलपति केदारभक्त माथेमा, पूर्वसभामुख दमननाथ ढुंगानालगायतले पहल गरेका थिए ।
१६औँ पटक इलाममा सत्याग्रह गरेका डा. केसीको स्वास्थ्य अवस्था कमजोर हुँदै गएपछि उनलाई काठमाडौं ल्याउन नागरिक समाजका अगुवाको पहलमा काठमाडौं लगिएको उनका सहयोगी धर्म गौतमले जनकारी दिए ।
धरानस्थित बीपी कोइराला स्वास्थ्य विज्ञान प्रतिष्ठानबाट खटिएको विशेषज्ञ चिकित्सकको टोलीले उनको स्वास्थ्यमा नौ प्रकारका समस्या औंल्याएको छ । डा. केसीलाई थप उपचारका लागि सुविधा सम्पन्न अस्पतालमा लैजान सुझाव आएको इलाम अस्पतालका मेडिकल अधिकृत डा. विजेन्द्रकुमार साहले जानकारी दिए ।
प्रतिष्ठानका सहनिर्देशक डा. विकास साह नेतृत्वको टोली केसीको उपचारमा बुधबार इलाम आइपुगेको थियो । स्वास्थ्य परीक्षणका क्रममा डा. केसीको शरीरमा अक्सिजनको मात्रा कम हुँदै ८० प्रतिशतमा झरेको, मुटुको चाल अनियन्त्रित भई घटेर ३५ र बढेर २०० सम्म पुग्ने गरेको, शरीरमा ग्लुकोजको मात्र कम हुँदै गएको छ ।
उनमा अनशनका कारण नियमित खाँदै आएको मुटुको औषधि खान छुटेको, शरीरमा हानिकारक रसायन बढ्दै गएको लगायतका समस्या देखिएको छ । नौ दिनदेखि अनशनरत डा. केसीको केसीको शरीरमा इन्फेक्सन बढ्दै गएको हो ।