केसीका पक्षमा खबरदारी
इलाम : डा. गोविन्द केसीलाई बिहीबार काठमाडौं लगिएपछि उनका समर्थकले सरकारलाई खबरदारी गरेका छन् । इलाममा डा. केसीको अभाव महसुस गरिएको उनीहरूको भनाइ छ ।
इलाम अस्पतालमा आईसीयू सेवा नभएकाले केसीलाई काठमाडौं लैजानुपरेको नागरिक अगुवा धर्म गौतमले बताए । माग पूरा गराएर पठाउन पाएको भए त्यसले जनतालाई अर्कै आनन्द दिलाउने गौतमको भनाइ छ ।
‘केसीले उठाएका माग उनको व्यक्तिगत नभई सिंगो राष्ट्र र जनताका हुन्’, उनले भने, ‘सरकार सम्झौताविपरीत अघि बढेका कारण केसीले सत्याग्रहको बाटो रोज्नुपर्यो ।’ नेकपा नेता योगश भट्टराईले इलाम आएर झूटको खेती गरेको आरोपसमेत उनले लगाए ।
महिला अधिकारकर्मी विष्णु दहालले केसीका माग बेथितिविरुद्ध भएकाले उनको समर्थन गर्दै सडकमा आएको बताइन् । नेकपा नेता झलनाथ खनाल र सुवास नेम्बाङले नदेखेका समस्या केसीले उठाएको उनको भनाइ छ । ‘केसीका माग पूरा नभएसम्म हामी सडकमै हुन्छौं’, उनले भनिन्, ‘केसीलाई इलामबाट लगियो भनेर सरकार चुप लागेर नबसोस् ।’
सत्याग्रह जारी रहँदा केसीको समर्थन गर्दै इलाममा दैनिक र्याली निकालिएको थियो । शुक्रबार पनि इलाममा र्याली निकालियो । उक्त र्याली सत्याग्रहस्थल ठूलो टुँडिखेल, नवीन चोक, मालापथ हुँदै पुनः बजारमा पुगेर सम्पन्न भएको थियो ।
संघीय लोकतान्त्रिक राष्ट्रिय मञ्च, संघीय लिम्बुवान मञ्चका अध्यक्ष कुमार लिङ्देनले केसीको विरुद्धमा भिजिलान्ते प्रयोग नगर्न सरकारलाई आग्रह गरे । ‘केसीमा जस्तो त्याग अरूमा हुँदैन’, उनले भने, ‘उनको अभियानविरुद्ध उत्रिए प्रतिकार गर्न तयार छौं ।’