तनहुँ : बलात्कारको आरोपपछि फरार रहेका शुक्लागण्डकी नगरपालिका–८ का वडाध्यक्ष कृष्णप्रसाद रेग्मीले अदालतमा आत्मसमर्पण गरेका छन् ।
त्यही वडाकी एक महिलाले रेग्मीले आफूलाई बलात्कार गरेको भन्दै इलाका प्रहरी कार्यालय बेलचौतारामा गत मंसिर पहिलो साता जाहेरी दर्ता गराएपछि उनी फरार भएका थिए ।
जाहेरी परेपछि अनुसन्धान अघि बढाएको इलाका प्रहरी कार्यालय बेलचौताराले उनको खोजी गरिरहेको थियो ।
ती महिलाले सोमबार शुक्लागण्डकी नगरपालिकाको न्यायिक समितिमा पनि रेग्मीविरुद्ध निवेदन दर्ता गराएकी थिइन् । न्यायिक समितिले बलात्कारको मुद्दा आफूले नहेर्ने भन्दै प्रहरीमा पठाएको थियो ।
यसअघि नै वडाध्यक्ष रेग्मीले आफूलाई फसाउन खोजिएको दाबीसहित आरोप अस्वीकार गरेका थिए ।आत्मसमर्पण गरेपछि उनीविरुद्ध महिलाको जाहेरीका आधारमा अदालतमा म्याद थप गरेर मुद्दा अघि बढाइने प्रहरीले जनाएको छ ।
प्रतिक्रिया दिनुहोस !
