रौतहट : डिभिजन वन कार्यालय रौतहटको गस्ती टोलीले गएराति पौराई जंगलको राजमार्ग छेउबाट सालको काँचो गोलियासहित बोलेरो जिप बरामद गरेको छ ।
सोमवार राति पूर्व–पश्चिम राजमार्गको पौराईस्थित लच्का नजिकै साहयक वन अधिकृत महेन्द्र प्रसाद जयसवाल नेतृत्वको वनगस्ती टोलीले काठ लोड गरिएको जिप बरामद गरेको हो ।
गस्ती टोलीलाई देखेपछि तस्करहरु अर्को जिपमा भागेको अधिकृत जयसवालले बताए । टोलीले एक राउण्ड गोली चलाएर ७ थान गोलिया काठ लोड भएको जीप बरामद गरेको हो ।
वन कार्यालयले करिब तीन महिनायता एक हजार ५ सय क्युफिट भन्दा बढी काठ बरामद गरिसकेको छ । वनभित्र नै काँचो रुख काटेर चिरान गरिरहेको अवस्थामासमेत तस्करहरु फेला परेका थिए ।
रौतहटमा पछिल्ला दिनहरुमा जिप, ट्याक्टर, मोटरसाइकल, साइकलमा राखेर सालका गोलियाहरु तस्करी हुने गरेको पाइएपछि वन कार्यालयले सुरक्षा निकायसँग समन्वय गरेर वनगस्ती बढाएको छ ।
काठ तस्करी बढी हुने क्षेत्रको नाकामा गस्ती बढाइएको रौतहटका वन अधिकृत विनोद सिंहले जानकारी दिए । रातको समयमा काठ चोरी बढी हुने भएकाले तस्करहरु फेला परेमा गोलीसमेत हानेर नियन्त्रणमा लिन आदेश दिएको सिंहले बताए ।
प्रतिक्रिया दिनुहोस !
