कुम्भ मेलामा औतारी साधु-सन्त : जसको साथमा छ राइफल, कम्मरमा गोली
नयाँदिल्ली : भारतको उत्तरप्रदेशमा जारी कुम्भ मेलामा अनेक रुप रंगका सन्त आफ्नो औतारी रुप देखाउँदै छन् । मेलामा आउने नदीमा नुहाएर फर्केका मात्रै छैनन्, उनीहरु त सन्तको जीवनशैली र कौशल हेरेर पनि आनन्द मानिरहेका छन् ।
यस क्रममा अद्वैत चैतन्य ब्रह्मचारी महाराज नामका सन्तको रुप अनौठो नै छ । ४९ किलोमिटर क्षेत्रफलमा फैलिएको यस मेलामा सम्भवतः उनी नै यस मेलाको आकर्षणको पात्र बनिरहेका छन् ।
श्रीपञ्च शम्भु अग्नि अखडाका यी सन्त चैतन्य महाराजको अनौठो तरिका किन पनि फरक छ भने उनले शरीरमा पहेँलो रंगको वस्त्र मात्रै ओढेका छैनन्, हातमा राइफल समेत छ ।
कम्मरमा रिभल्वर राखेका उनी राइफल हर बखत हातमा बोकेर हिँडिरहन्छन् । राइफल बोक्नुको कारण पनि अन्य सन्तको भन्दा भिन्न छ । चैतन्य बाबा आफू एक पटक आतंकवादीको हमलामा परेको दाबी गर्छन् । हमलाको बेला आफूलाई शरीरमा १२ गोली लागेको उनको जिकिर छ । तै पनि बाँच्न सफल भएको उनी बताउँछन् ।
चैतन्य बाबा भन्छन्, ‘९० को दशकमा शीतला मन्दिर, पन्जाबमा रहँदा खालिस्तानी आतंकी ब्यापक उग्र थिए । म साधु थिएँ । मलाई आफ्नो मन्दिरको रेखदेख गर्नु थियो । ८ मे १९८७ मा आतंकवादीले मन्दिरमा हमला गरे । मैले एक्लै आतंकवादीविरुद्ध लडेँ । मलाई शरीरमै १८ गोली समेत लाग्यो । तर पनि माता गायत्री तथा परशुराम भगवानको कृपाले म बाँच्न सफल भएँ ।’
उनले अघि भने, ‘म दुई वर्ष त अस्पतालमै रहेँ । तब म आतंकवादीको हिट लिस्टमा परेँ । किनकी, मैले उनीहरुको हमला असफल बनाइदिएको थिएँ । यसको बदला तत्कालीन पन्जाब सरकारका मुख्यमन्त्री बरनालले मलाई मेरो सुरक्षाको लागि दिल्लीको नरैलीमै फ्ल्याट समेत दिएका थिए ।’ एक सन्तले साथमा हतियार राख्न सम्भव छ ? भनेर सोध्दा ‘राइफलवाले बाबा’ आफू परशुराम तथा गायत्रीको असल उपाशक भएकाले हतियार लिनु सम्भव भएको दाबी गर्छन् ।
हतियारको विशेषता के हो ?
श्रीपञ्च शम्भु अग्नि अखडाको एउटा विशेषता के भने यहाँ सन्तहरु नागा नभएर ब्रह्मचारी साधु बन्न सक्छन् । साथै साधुहरु अन्य स्थानको भन्दा फरक देखिन्छन् । र उनीहरु अधिकांश माता गायत्रीका उपासक हुन्छन् । कोही पनि मादक पदार्थ ग्रहण गर्दैनन् ।
यस ऐतिहासिक विश्वासका आधारमा पनि साधु चैतन्य बाबा आफू हतियार बोकेर हिँड्छन् । जुन कुम्भ मेलामा आकर्षक मानिएको पनि छ । चैतन्य बाबा भने आफूलाई ‘राइफलवाले बाबा’भनी सबैले सम्बोधन गर्दा मक्ख छन् । यद्यपी कतिपयले भने एक साधुको हातमा हतियार हुनुलाई अनौठो ठानेका छन् ।