जनकपुरधाम : जनकपुरधाम उपमहानगरपालिका–१२ कुवामा करेन्ट लागेर मृत्यु भएका दुईजनाको परिवारलाई प्रदेश सरकारले राहत स्वरुप एक/एक लाख रुपैयाँ दिने घोषणा गरेको छ ।
शनिबार प्रदेश २ का भौतिक पुर्वाधार विकास मन्त्री जितेन्द्र सोनल, वन, पर्यटन राज्यमन्त्री सुरेश मण्डल र प्रदेशसभा सदस्य परमेश्वर साह सहितको टोलीले मृतकका परिवारजनलाई घरमै गइ भेटेका हुन् ।
करेन्ट लागेर अकालमै ज्यान गुमाएका दुवैजनाको परिवारलाई प्रदेश सरकारको तर्फबाट आर्थिक सहयोगको घोषणा मन्त्री सोनलले गरेका थिए ।
मृतकमध्येका एक धनुषाको मिथिला बिहारी नगरपालिका–३ का २८ वर्षीय परमेश्वर मण्डलको परिवारलाई भेटेर प्रदेश सरकारका मन्त्रीहरुले मृतकप्रति श्रद्धाञ्जली अर्पण गर्नुका साथै परिवारका सदस्यलाई सान्त्वना दिए ।
मन्त्री सोनलले मण्डलको मृत्युले मधेसलाई नै क्षति भएको र उनीहरुको परिवारलाई राहतको लागि सरकारले सानो सहयोग गरेको प्रतिक्रिया दिएका थिए । साथै मृतक दुवैजनाका पत्नीहरुलाई समेत रोजगारको व्यवस्था मिलाउन समेत प्रदेश सरकारले सक्दो प्रयत्न गर्ने आश्वासन मन्त्री सोनलले दिएका छन् ।
उक्त दुर्घटनामा परी सिरहाको विष्णपुरा गाउँपालिका–४ का ३२ वर्षीय जगरनाथ साहको पनि मृत्यु भएको थियो । जग्गा खरिद गर्नका लागि हिँडेका दुवैजनाको मोटरसाइकल खेततिर जाने धुलाम्य सडका चिप्लिएर बिजुलीको पोलमा उछिटिएर पुगेको थियो ।
पोलमा अर्थिङ गरी प्रसारित ११ हजार भोल्टेजको करेन्ट लागेर परमेश्वरको पहिला मृत्यु भयो । उनलाई बचाउन गएका अर्का मोटरसाइकल चालक जगरनाथको पनि करेन्ट लागि घटनास्थलमै मृत्यु भएको थियो ।
प्रतिक्रिया दिनुहोस !
