विराटनगर : प्रदेश नम्बर १ को अस्थायी राजधानी विराटनगरबाट प्रत्येक शनिबार हुँदै आएको माउण्टेन फ्लाइट (पर्वतिय उडान) बन्द भएको छ । विराटनगरका पर्यटन तथा होटल व्यवसायीहरुले ‘विराट होलिडेज‘ नामवाट साताको प्रत्येक शनिबार प्रर्यटन प्रवद्र्धनका लागि भन्दै विराटनगरबाट माउण्टेन फ्लाईट गर्दै आएको छ ।
मंसिरको पहिलो शनिबारबाट सुरु गरिएको माउण्टेन फ्लाइट पुसदेखि बन्द भएको हो । चारवटा उडान भरेपछि पुसदेखि खराब मौसमको कारण देखाउँदै उडान बन्द गरिएको हो । होलिडेजका अध्यक्ष एवं नेपाल उद्योग वाणिज्य महासंघ प्रदेश १ का पर्यटन संयोजक भविषकुमार श्रेष्ठ हिमाल दृष्यावलोकनका लागि मौसम अनुकूल नभएकाले पुस र माघमा माउण्टेन फ्लाइट बन्द गरिएको जानकारी दिए । उनले मौसमको खराबीले दृष्यावलोकन गर्न नसकिने भएकाले उडान बन्द गरिएको जानकारी दिए । उनले फागुनमहिना देखि नियमित उडान हुने जानकारी दिए ।
हिमाली उडानका लागि प्रति व्यक्ति नौ हजार नौ सय रुपैयाँ टिकट शुल्क लिंदै आएको होलिडेजले आउँदो दुईवटा फ्लाइटको टिकट पूरै बिक्री भइसकेको जनाएको छ । होलिडेजका अध्यक्ष श्रेष्ठले पूर्वका पर्यटन व्यवसायीहरुले प्लेन चार्डड गरेर माउण्टेन फ्लाइट सुरु गरिसकेकाले अव सरकारले यसलाई प्राथमिकतामा राख्नुपर्ने बताए । उनले भने,‘ यो उत्साहलाई सरकारको सहयोग र संलग्नता आवश्यक रहेको छ ।’ प्रदेश सरकारको नीति तथा कार्यक्रममा समेत माउण्टेन फ्लाइटलाई लिपीबद्ध गरिएको छ ।
करिब एक घण्टाको उडानले सगरमाथा, लोत्से, मकालु, कञ्जनजंघा, कुम्भकर्ण गरी कम्तीमा १४ वटा हिमाली क्षेत्रको मनोरम दृष्यावलोकन गराउँदै आएको श्रेष्ठले बताए । हिमाली उडानको उदेश्य आन्तरिकसंगै छिमेकी राष्ट्र भारतको विहार, तथा पश्चिम बंगालका पर्यटकलाई भित्राउने रहेको उनको भनाइ छ ।
माउण्टेन फ्लाईटमा विदेशीलाई आकर्षण गर्न सके होटेल व्यवसाय समेत राम्रोसंग फस्टाउने उनले बताए । श्रेष्ठले माउन्टेन नीजि स्तरमा प्रर्यटन व्यसायहरुले सुरु गरेको माउण्टेन फ्लाइटले कुनै घाटा नभएको बताए । नेपालमा सबै भन्दा बढी भारतीय पर्यटक आउने भएकाले अव प्रचार प्रसार गर्न ठूलो धनराशी आवश्यक रहेकाले सरकारले नै अव ठोस नीति ल्याएर सञ्चालन गर्नु पर्ने बताए ।
माउण्टेन फ्लाइटसंगै आफूहरु विराटनगरबाट लुम्बिनी, पोखरा र भारतको बनारससम्मको फ्लाइटको लागि पहल गरिरहेको उनले बताए । मंसिर महिनाबाट सुरुआत गरिएको माउण्टेन फ्लाइट अन्र्तगत पहिलो फ्लाइटमा प्रदेश १ का मुख्यमन्त्री शेरधन राई लगायत विशिष्ट व्यक्तिगतहरु समावेश रहेका थिए । माउण्टेन फ्लाइटका क्रममा प्रदेश सरकारका पदाधिकारीहरुले पर्यटन प्रवद्र्धनका लागि आपूmहरुले बजेट विनियोजन गर्दै अघि बढ्ने बताएका थिए ।
प्रतिक्रिया दिनुहोस !
