काठमाडौं : गाँजाको विषयलाई लिएर जिल्ला प्रहरी कार्यालय सिन्धुलीका प्रहरी उपरीक्षक (एसपी) रामेश्वर प्रसाद यादवमाथि छानविन हुने भएको छ । सिन्धुलीमा गाँजा उत्पादन बढेको र समयमै नष्ट नगरेको भन्दै उनीमाथि प्रहरी मुख्यालयले छानविन गर्ने भएको हो ।
आइतबार प्रहरी प्रधान कार्यालयमा बसेको बैठकमा प्रहरी महानिरीक्षक सर्वेन्द्र खनालले यादवमाथि छानविन हुने बताएका हुन् । सुरुमा निर्वाध गाँजा उत्पादन भइरहे पनि एसपी यादवले उपल्लो निर्देशनपछि मात्रै गाँजा फडानी गरेको प्रसंग बैठकमा उठेको थियो ।
यादवले आफ्नै सक्रियतामा गाँजा फडानी नगरी निर्देशन कुरेर बस्दा मिलेमतो हुनसक्ने भएकाले उनीमाथि छानविन गर्नुपर्ने आवाज बैठकमा उठेको एक प्रहरी उच्च अधिकृतले बताए । उनले भने, ‘जिल्लामा के भइरहेको छ त्यसबारे ईन्चार्ज जानकार हुनुपर्छ तर यादवको सुपरिवेक्षण अभाव देखिएकाले उनीमाथि छानविन हुनुपर्ने विषय उठेका हो ।’
प्रहरी महानिरीक्षक खनालले एसपी यादवलाई छानविन गर्ने र दोषी देखिए विभागीय कारबाही गर्ने जबाफ वैठकमा दिएका थिए । खनालले अन्नपूर्णसँग भने, ‘अहिले प्रदेशस्तरबाट छानविन भइरहेको छ । आवश्यक परे केन्द्रबाटै छानविन हुन्छ ।’
गाँजा उत्पादनमा यादवको मिलेमतो देखिए उनलाई कारबाही गर्न आफु नचुक्ने भनाइ खनालको छ । माथिल्लो निर्देशनपछि अहिले सिन्धुली प्रहरीले ३७ बिघा जमिनमा लगाइएको गाँजा नष्ट गरिसकेको छ । एसपी यादव आफैं गाँजा फडानीमा खटिँदै आएका छन् ।
प्रतिक्रिया दिनुहोस !
