विभिन्न क्षेत्रका २२ जनालाई सम्मान
काठमाडौं : विभिन्न क्षेत्रमा रहेर राष्ट्रका लागि महत्वपूर्ण योगदान पुर्याएका २२ व्यक्तित्वलाई सम्मान गरिएको छ ।
जिउँदो सहिद गुरु पण्डित दुर्गाप्रसाद भट्टराई प्रतिष्ठान र गान्धी इन्टरनेशनल मिसनले सहिद दिवसका अवसरमा राजधानीमा आयोजना गरेको कार्यक्रममा संघीय मामिला तथा सामान्य प्रशासनमन्त्री लालबाबु पण्डितले सम्मान गरेका हुन् ।
प्रतिष्ठानका अध्यक्ष दुर्गाप्रसाद भट्टराईले पशुपतिनाथ मन्दिरका मूलभट्ट र भट्टहरू, सञ्चारकर्मी, सुरक्षाकर्मी, मानवअधिकारकर्मी र समाजसेवीलाई सम्मान गरिएको जानकारी दिएका हुन् ।
उनका अनुसार, मूलभट्ट गणेश भट्ट, भट्टहरू श्रीराम कायस्थ भट्ट, नारायण भट्ट, राधादेवन भट्ट र गिरिश भट्ट, सञ्चारकर्मीमा अन्नपूर्ण पोष्ट दैनिकका गोपीकृष्ण ढुंगाना, भक्तिदर्शन टेलिभिजनकी हेमा शर्मा र इमेज टेलिभिजनका कूलचन्द्र भट्टराई, नेपाल प्रहरीका आइजीपी सर्वेन्द्र खनाल, डिएसपी सुनिल मल्ल र इन्स्पेक्टर मीनबहादुर कुँवर क्षेत्रीलाई सम्मान गरिएको हो ।
यसैगरी, मानवअधिकारकर्मी राष्ट्रिय मानवअधिकार आयोगका कार्यकारीनिर्देशक यज्ञप्रसाद अधिकारी, समाजसेवीहरू कमलकुमार खड्का, लक्ष्मीदेवी ढुंगाना, लक्ष्मीदेवी राउत, रामबहादुर कार्की, दुर्गाबहादुर मिश्र, नवराज खतिवडा, डम्बर श्रेष्ठ, लक्ष्मीप्रसाद लुइँटेल, विमला महत पण्डित र भुवनप्रसाद रेग्मीलाई सम्मान गरिएको हो ।
कार्यक्रममा पूर्वगृहमन्त्री प्रकाश सिंह, पूर्वसंस्कृति मन्त्री रामकुमार श्रेष्ठ, पूर्वप्रधान सेनापति रुक्मांगत कट्वाल लगायतको सहभागिता थियो ।