नुवाकोट : नुवाकोटको पुर्वी भेगमा रहेको रातमाटेमा घर भत्कांदा स्थानीय एक वृद्धको ज्यान गएको छ भने उनका छोरा घाइते भएक छन् ।
सदरमुकाम विदुरदेखि २० किलोमिटर दक्षिणस्थित बेलकोटगढी नगरपालिका–७ रातमाटेको आलडाँडाँमा वुधवार विहान ३ बजेतिर घर भत्किँदा स्थानीय ८५ वर्षीय कप्तान तामाङको मृत्यु भएको जिल्ला प्रहरी कार्यालय नुवाकोटले जनाएको छ ।
घर भत्किएर उनका ५२ वर्षीय छोरा शुक्रबहादुर घाइते भएको जिल्ला प्रहरी प्रमुख तथा प्रहरी उपरीक्षक कृष्णबहादुर पल्लीमगरले जानकारी दिए । उनको स्वास्थ्य संस्थामा उपचार भइरहेको छ ।
२०७२ वैशाखको विनाशकारी भूकम्पले चर्किएर कमजोर भएको कच्ची घरमा बस्दै आएका वृद्धको त्यही घर भत्किदा थिचिएर ज्यान गएको बेलकोटगढी–७ का वडाध्यक्ष हेमनिधि नेपालले बताए । परिवारका अन्य सदस्य नजिकैको अस्थायी टहरामा बस्दै आएकाले बाँच्न सफल भए ।
वृद्ध तामाङ भने छोरासहित चर्किएको घरमा बस्दै आएकाले यो दुर्घटना भएको वडाध्यक्ष नेपालले बताए । उनको शव अस्पतालमा पोष्टमार्टम गरिएको छ ।
प्रतिक्रिया दिनुहोस !
