भोजपुर : प्रदेशसभा तथा प्रतिनिधिसभा निर्वाचनको समयमा बम विस्फोट र ज्यान मार्ने उद्योग आरोपको मुद्दामा नेपाल कम्युनिष्ट पार्टीका महासचिव नेत्रविक्रम चन्द ‘विप्लव’ सहितले सफाइ पाएका छन् ।
अदालतले विप्लवसहित प्रवक्ता खड्गबहादुर विश्वकर्मा ‘प्रकाण्ड’ र अन्य २० जनाविरुद्ध लगाइएको मुद्दामा १६ जनालाई जिल्ला अदालत भोजपुरबाट सफाइ पाएका हुन् । जिल्ला न्यायाधीश हरिशचन्द्र इङ्नामको इजलासले नेकपाका महासचिव विप्लव, प्रवक्ता प्रकाण्ड, पोलिटब्यूरो सदस्य पदमबहादुर राईसहित १६ जनालाई सफाइ दिएको हो ।
गत वर्ष सम्पन्न प्रदेश तथा प्रतिनिधिसभा निर्वाचनमा महासचिव ‘विप्लव’ र प्रवक्ता ‘प्रकाण्ड’, स्थायी कमिटी सदस्य धर्मेन्द्र बस्तोला, पोलिट्ब्युरो सदस्य पदमबहादुर राई लगायत २० जनालाई जिल्लाको ३ विभिन्न स्थानमा बम पड्काएको आरोपमा ज्यान मार्ने उद्योग, विष्फोटक पदार्थ र आगजनीको गरेको आरोपमा जिल्ला अदालतमा मुद्धा दायर भएको थियो ।
टेम्केमैयुङ गाउँपालिका ६, कोटको गुम्बास्थित तात्कालिन प्रदेशसभा उम्मेद्वार एवम् हाल प्रदेश नं. १ का मुख्यमन्त्री शेरधन राई चढेको जिपमा बम विष्फोट र साल्पासिलिछो गाउँपालिका २, कुलुङको सहकारी टोलमा बाम गठबन्धनको चुनावी सभामा बम विष्फोट गरी २ वटा ज्यान मार्ने उद्योग र षडानन्द नगरपालिका १३, भिरथाप्लामा भएको बम विष्फोटसम्बन्धी मुद्दा दायर भएको थियो ।
ज्यान मार्ने उद्योगसम्बन्धी मुद्दामा सफाइ पाउनेहरुमा नेकपाका कार्यकर्ता बम विष्ट, जुद्ध बस्नेत, लक्ष्मी तामाङ, तिलक गुरुङ्ग, दिनेश अधिकारी, त्रिलोचन लोहार, गोपी विक, कुमार तामाङ लगायतका रहेका छन् ।
यस्तै महेन्द्र तामाङ र प्रकाश गुरुङ्गलाई तीनवटा बम विस्फोटसम्बन्धी मुद्धामा ४० हजारको दरले जरिवाना लिईएको जिल्ला अदालत भोजपुरका श्रेस्तेदार राजकुमार दाहालले बताए ।
त्यस्तै नेकपाका स्थायी समिति सदस्य धर्मेन्द्र बास्तोला र किराती राष्ट्रिय मुक्ति मोर्चाका अध्यक्ष मादेन किरातीको ठेगान स्पष्ट नखुलेकोले तामेलीमा राखिएको छ । यसअघि गत भदौ २० गते त्यही मुद्दामा नेकपाका प्रवक्ता प्रकाण्डलाई पक्राउ गरि भोजपुर ल्याइएको थियो । उनी ६० हजार धरौटीमा छुटेका थिए ।
प्रतिक्रिया दिनुहोस !
