बेनी : मुस्ताङ र म्याग्दीको उच्च पहाडी क्षेत्रमा दुई साताअघिको हिउँ पग्लिन नपाउँदै बिहीबार बिहानैदेखि पुनः हिमपात सुरु भएको छ । म्याग्दीको धवलागिरी गाउँपालिका–१ गुर्जा र अन्नपूर्ण गाउँपालिका–६ घोडेपानी, उपल्लो मुस्ताङको मुक्तिनाथ, लोमान्थाङ, छोसेर, घमी, समरका लगायत क्षेत्रमा माघ १२ र १३ गतेको हिउ पग्लिसकेको थिएन ।
बिहीबार बिहानैदेखि पुनः हिउँ पर्न थालेपछि अत्याधिक चिसो बढेको महशुस भएको छ । हिमपात र चिसोका कारण घरबाहिर निस्कन सक्ने अवस्था नरहेको धवलागिरी गाउँपालिका ७ ताकमका गोपाल आचार्यले बताए ।
चिसोका कारण पर्यटकीय स्थलहरु सुनसान भएको र स्थानीयबासीको जनजिवन प्रभावित भएको मुक्तिनाथका सुरज गुरुङले बताए ।
हिमपातका कारण भेडा, च्याङग्रा, चौरीगाई लगायत बस्तुभाउलाई आहराको समस्या हुन थालेको जोमसोम ठिनीका कुलबहादुर थकालीले बताए । हिमपात र खराम मौसमका कारण पोखरा–जोमसोम हवाई उठान अवरुद्ध भएको मुस्ताङका प्रहरी नायव उपरीक्षक महेन्द्र खड्काले बताए । बेजोडका साथ हावा चलेको खड्काले जानकारी दिए ।
उनका अनुसार जोमसोम देखि उपल्लो मुस्ताङमा गाडीहरु नछुटेपनि बेनी–जोमसोम सडकमा दिउँसो सम्म सवारी साधन सञ्चालन भइरहेका छन् । मुस्ताङ र म्याग्दीमा यसपाली चौथो पटक हिमपात भएको छ ।
हिमपातका कारण म्याग्दीको धवलागिरी गाउँपालिका १ गुर्जा पैदलमार्गबाट बिच्छेद भएको छ । केही दिनअघि हिउँ पन्छाएर खुलाइएको पैदलमार्ग पुनः हिउँले पुरिएपछि भौगोलिक रुपमा विकट र दुर्गम क्षेत्रमा पर्ने गुर्जा यातायात सम्र्पक बिच्छेद भएको वडा अध्यक्ष झकबहादुर छन्त्यालले बताए ।
म्याग्दीको पर्यटकीय स्थल घोडेपानी र टोड्केमा पनि हिमपात भएको छ । बर्षा र हिउँले खेतीबालीमा क्षति पुगेर कृषक चिन्तीत भएका मालिका गाउँपालिका ५ देविस्थानकी वडा अध्यक्ष पिपला बुढाले बताइन् ।
मुस्ताङको मुक्तिनाथमा हिउँपरेपछिको दृष्य । तस्बिर : सुरज गुरुङ
प्रतिक्रिया दिनुहोस !
