बिपी स्वास्थ्य विज्ञान प्रतिष्ठानमा हावाबाट अक्सिजन उत्पादन
माघ २४, २०७५ बिहीबार १४:५५:०
धरान : बिपी कोइराला स्वास्थ्य विज्ञान प्रतिष्ठान धरानले हावाबाट अक्सिजन उत्पादनको सुरुवात गरेको छ ।
विरामीको उपचारमा प्रयोग गरिने हावाबाट उत्पादन गरिएको अक्सिजन प्रतिष्ठानका विभिन्न वार्डहरुमा पाईपलाईनबाट विस्तार गरी संचालनमा ल्याइएको छ ।
अक्सिजनको उत्पादनसँगै प्रतिष्ठानले अक्सिजनमा खर्च गर्दैआएको वार्षिक कराडौं रुपैयाँ रकम बचत हुने बताइएको छ । प्रतिष्ठानको हाताभित्र संचालनमा आएको अक्सिजन प्लान्टबाट बिहीबारदेखि हावाबाट प्रतिमिनेट १६ सय लिटर अक्सिजन उत्पादन थालिएको छ । नयाँ अक्सिजन प्लान्टको उद्घाटन उद्घाटन बिपी प्रतिष्ठानका उपकुलपती डा. राजकुमार रौनियार र निर्देशक गौरीशंकर साहले संयुक्त रुपमा गरेका थिए ।
प्लान्टबाट प्रतिमिनेट १६ सय लिटर अक्सिजन उत्पादन हुने प्रतिष्ठानका निर्देशक डा. गौरीशंकर साह बताउँछन् । अक्सिजन प्लान्टबाट एक घण्टामा १० वटा सिलिण्डर भर्न सकिने बुस्टर क्षमता सहित दैनिक ६० सिलिण्डर भर्न सकिने प्रतिष्ठानका उपकुलपति डा. राजकुमार रौनियारको भनाइ छ ।
रौनियारका अनुसार प्रतिष्ठान अब आत्मनिर्भर हुनुका साथै बिरामीको उपचारमा सहज भएको छ । अक्सिजन उत्पादन भएसँगै प्रतिष्ठानका वार्डहरु, आईसियू, एनआईसियू लगायत अतिआवस्यक स्थानमा पाईपलाइनबाट अक्सिजनको विस्तार भएको छ । अक्सिजन उत्पादनका लागि तीनजना प्राविधिक परिचालन समेत गरिएको छ ।
प्रतिक्रिया दिनुहोस !
