अनौठो सम्बन्ध : बाँदरलाई १७०० रोटी नियमित खुवाउँछन् स्वप्निल

नयाँदिल्ली : भारतको गुजरातस्थित एउटा गाउँ छ, अस्लाली गाउँ । यसको छेउमा रहेको हरियाली चौरमा थुप्रै लंगुर बाँदर खानाको खोजीमा आउँछन् ।

बालबालिकाहरु ती बाँदरलाई देखेर भाग्छन्, युवाहरु लखेट्छन् । जमालपुर दरवाजाका स्वप्निल सोनी भने ती बाँदरको लागि खाना बोकेर पुग्छन् त्यहाँ । हरेक सोमबार बिहान उनी ती बाँदरको लागि १७ सयवटा चपाती (रोटी) बोकेर पुग्छन् त्यहाँ । चौरमा बसेर स्वप्निलले हरेक बाँदरलाई रोटी बाँड्न थालेको १० वर्ष भइसक्यो ।

स्वप्निलको यस्तो काम देखेर सबै दंग पर्छन् । सुरुमा त उनलाई देखेर मान्छेहरु हाँस्थे पनि । पछिल्लो समय चाहीँ स्वप्निलको कामबाट प्रभावित भएर केही युवाले उनलाई साथ दिन्छन् ।

स्वप्निल त्यहाँ बाँदरहरुसँग २ देखि ३ घण्टा रमाइलो समय बिताउँछन् । उनी आफ्नो परिवारका सदस्यलाई पनि सँगै लिएर जान्छन् । अचेल त उनको यो पेशा जस्तै बनेको छ । अलजजिरा लगायत केही मिडियाले समेत उनको यस्तो कामको भिडियो रिपोर्ट बनाएपछि यस कामको प्रभाव झन बढेको स्वप्निल बताउँछन् ।

उनी भन्छन्, ‘अचेल त म पनि ती बाँदरको परिवारकै सदस्य पो हुँ कि जस्तो लाग्छ । वा ती मेरो परिवारका सदस्य हुन् ।’ स्वप्निलको यस्तो काम प्रेरणादायी नै बनेको छ । बाँदरलाई पनि खाना चाहिने भएकाले खाना खुवाएर मानवीय भाव प्रकट गर्नुपर्ने ठान्छन् ।