धनगढी : धनगढी प्रिमियर लिग (डीपीएल) तेस्रो संस्करणको ट्रफी सार्वजनिक गरिएको छ । धनगढीमा एक कार्यक्रम आयोजना गर्दै सहभागी टोलीका खेलाडीसहित आयोजक धनगढी क्रिकेट एकेडेमीका अध्यक्ष सुवास शाही र डीपीएलका सद्भावना दूत जोन्टी रोड्सले ट्रफी सार्वजनिक गरेका हुन् ।
जोन्टी रोड्स दक्षिण अफ्रिकाका पूर्वखेलाडी तथा प्रशिक्षक हुन् । डीपीएलमा उनी मुख्य आकर्षण रहनेछन् । यसपटक पुरस्कार राशि पनि गत वर्षभन्दा बढाएर ३० लाख रुपैयाँ कायम गरिएको छ ।
डीपीएलको तेस्रो संस्करणमा उत्कृष्ट खेलाडीलाई दिइने गोल्ड स्टार सुनको जुत्ता पनि सार्वजनिक गरिएको छ ।
डीपीएलको तेस्रो संस्करणमा धनगढी स्टार्स, सीवाईसी अत्तरिया, महेन्द्रनगर युनाइटेड, काठमाडौं गोल्डेन, विराटनगर किङ्स र रूपन्देही च्यालेन्जर्सले प्रतिस्पर्धा गर्नेछन् ।
प्रतियोगिता दुई दिन पर सर्यो
प्रतिकूल मौसमका कारण मैदान हिलाम्य भएपछि शनिबारबाट सुरु हुने भनिएको धनगढी प्रिमियर लिग दुई दिनपछाडि धकेलिएको छ । सुदूरपश्चिम क्षेत्रबाट नेपाल प्रवेश गरेको मनसुनी हावाले यस क्षेत्रमा दुई दिनदेखि वर्षा भइरहेको छ । बिहीबार राति भएको वर्षाले फाप्ला क्रिकेट मैदान हिलाम्य भएपछि प्रतियोगिता दुई दिनपछाडि सारिएको आयोजकले जनाएको छ ।
प्रतियोगिता अब सोमबारबाट मात्रै सुरु हुनेछ । सोमबार हुने पहिलो खेलमा काठमाडौं गोल्डेन र धनगढी स्टार्सबीच प्रतिस्पर्धा हुनेछ । यस्तै अर्को खेलमा रुपन्देही च्यालेन्जर्स र महेन्द्रनगर युनाइटेडबीच खेल हुनेछ ।
यसअघिका दुई संस्करण संघीय प्रहरी कार्यालयको खेल मैदानमा भएको थियो । तेस्रो संस्करणका लागि फाप्ला क्रिकेट मैदान तयार पारिएको छ । मोहना नदीको किनारमा रहेको जग्गामा बनाइएको फाप्लामा गत वर्ष मात्रै माटो भरिएकाले पानी परेपछि हिलाम्य भएको हो ।
हिलाम्य मैदानमा क्रिकेट खेलाउन समस्या देखिएकाले प्रतियोगिता दुई दिन पर सारिएको हो । सबै खेलको प्रत्यक्ष प्रसारण एपीवान टेलिभिजनले गर्नेछ ।
अत्तरियाको जर्सी सार्वजनिक
डीपीएलको स्थानीय टोली सीवाईसी अत्तरियाले जर्सी सार्वजनिक गरेको छ । धनगढीमा एक कार्यक्रम आयोजना गर्दै विदेशी प्रशिक्षक रायन मारुन र डीपीएलका सदभावना दूत जोन्टी रोड्सको उपस्थितिमा अत्तरियाले जर्सी सार्वजनिक गरेको हो । कार्यक्रममा अत्तरियाका कप्तान दीपेन्द्रसिंह ऐरीले प्रतियोगिताका लागि टोली तयार रहेको बताए ।
प्रतिक्रिया दिनुहोस !
