गाईघाट : जंगली हात्तीको आक्रमणबाट ज्यान गुमाएका उदयपुर बेलका नगरपालिका–३ का रामकुमार सार्कीको परिवारलाई राहत स्वरुप १० लाख रुपैयाँ उपलब्ध गराइएको छ ।
कोशीटप्पु वन्यजन्तु आरक्ष केन्द्रले उपलब्ध गराएको रकम डिभिजन वन कार्यालय उदयपुरका प्रमुख विष्णुप्रसाद आचार्यले मृतकका वुवा डम्बरबहादुरलाई सोमबार हस्तान्तरण गरेका हुन् ।
राहत रकम लिन कार्यालय आईपुगेका डम्बरबहादुरलाई प्रमुख आचार्यले सञ्चारकर्मीको रोहवरमा चेक हस्तान्तरण गरे । गत साउन ३० गते घरमा बसिरहेका बेला कोशीटप्पुबाट निस्किएको जंगली हात्तीले ४१ वर्षीय सार्कीलाई कुल्चिँदा ज्यान गएको थियो ।
हात्तीको आक्रमणबाट ज्यान गुमाएको पुष्टि भएपछि कार्यालयले वन्यजन्तुबाट हुने क्षतिको राहत सहयोग निर्देशिका २०६९ दोश्रो संसोधन २०७४ को दफा ५ (क) (ई) वमोजिम राहत उपलब्ध गराउनका लागि तत्कालिन क्षेत्रीय वन निर्देशनालयलाई सिफारिस गरेको कार्यालयका सूचना अधिकारी जागेश्वर साहले बताए ।
जंगली हात्तीको आक्रमणबाट पछिल्लो एक वर्षमै तीनजनाले ज्यान गुमाएका छन् । हात्तीको आक्रमणबाट ज्यान गुमाएका बेलका नगरपालिका–३ शुक्रबारेका ५७ वर्षीय बुद्धीमान मगर र त्रियुगा नगरपालिका–१२ का ७८ वर्षीया सावित्रा राईको पनि आवश्यक मुचुल्का तयार पारी राहतका लागि सिफारिस गरिएको साहले बताए ।
मगरलाई गत मंसिर २६ गते र राईलाई पुस १५ गते जंगली हात्तीले आक्रमण गरेको थियो । आरक्षबाट निस्किएका जंगली हात्तीले वर्षेनी आधा दर्जनको संख्यामा सर्वसाधरणलाई आक्रमण गर्ने गरेको छ भने स्थानीयले लगाएको अन्नवाली समेत नष्ट गर्ने गरेको छ ।
प्रतिक्रिया दिनुहोस !
