ललितपुर : ढोलाहिटीस्थित मेलम्चीको निर्माणाधीन ट्यांकीमा खसेर एकजना पेटी ठेकेदारको मंगलबार बिहान मृत्यृ भएको छ । महानगरीय प्रहरी वृत्त चापागाउँका डिएसपी राजकुमार खिउजुका अनुसार मृतक पश्चिम चम्पारम १९ भारतका ४९ वर्षीय ईश्वर महतो हुन् ।
खिउजुका अनुसार महतो ट्यांकीमाथि कोरा हालेर मसिनो गर्ने काम भइरहेको हेर्न जाँदा अकस्मात म्यानहोल (ठाउँठाउँमा मान्छे छिर्न राखिएको ठाउँ) मा अल्झेर ट्यांकीभित्र खसेका थिए ।
माथिबाट खसेका उनको घटनास्थलमै टाउको फुटेर मृत्यु भएको हो। 'ट्यांकीको उचाई करिब ६ मिटर अग्लो छ', खिउजुले भने, 'त्यही ट्यांकीमा खसेपछि टाउको फुटेर उनको घटनास्थलमै मृत्यु भएको देखिन्छ ।'
ट्यांकीबाट खसेका महतोको टाउको फुट्नुका साथै आँखामा रगत जमेको देखिएको थियो । निधार भन्दामाथि चोट देखिएको खिउजुले जानकारी दिए ।
२० वर्षदेखि ढलान र प्लाष्टरको काम गर्ने महतो ढोलाहिटीमा दुई महिना अघि मात्रै आएका थिए । अन्य ठाउँमा काम गरेर ढोलाहिटी आएका उनी ट्यायांकी निर्माण सकेपछि झापा जाने तयारीमा थिए ।
उनको शव पोस्टमार्टमका लागि पाटन अस्पताल पठाइएको छ। शव उठाउनुअघि अस्पतालबाट फोरेन्सिक टोली र अपराध महाशाखाका प्रहरी अनुसन्धानका लागि आएका थिए ।
उनका परिवारका सदस्यले यो घटनामा शंका गर्ने अवस्था नरहेको स्वीकार गरेका छन् । उनको शव परिवारले जिम्मा लिइसकेका छन् । ढोलाहिटीस्थित मेलम्ची खानेपानी आयोजनाका प्रतिनिधि मुकुन्द शर्माले यस घटनाको जानकारी नपाएको बताए ।
उनका अनुसार ढोलाहिटीमा ट्यांकी निर्माण भइसकेर फिनिसिङ चलिरहेको छ । उपत्यकाका ११ ठाउँमा मेलम्चीका ठुला ट्याङ्की बनिरहेका छन् । ललितपुरको ढोलाहिटीमा मात्रै दुईवटा ट्याङ्की बनेका छन् । यी ट्यांकीको क्षमता ९५ लाख लिटर रहेको छ ।
प्रतिक्रिया दिनुहोस !
