डोल्पा : डोल्पाको सदरमुकाम दुनैको फोहोर जनप्रतिनिधि र कर्मचारीले उठाउने गरेका छन् । विभिन्न दिवस,पर्वको अवसरमा जिल्लाका सरकारी तथा गैह्रसरकारी कार्यालयका कर्मचारी,सेना,प्रहरी र जनप्रतिनिधिहरुले बजारमा यत्रतत्र फालिएका फोहोर उठाउने गरेका हुन् ।
होटेल र पसलेहरुले आफनो ढोका अघि मात्र सफा गर्ने र आफनो घरको फोहोरसमेत छिमेकीका घर वरिपरि फाल्ने गरेको ठुलीभेरी नगरपालिका ३ का अध्यक्ष अर्णबहादुर न्यौपाले जानकारी दिए ।
हरेक पटक बजारको फोहोर जनप्रतिनिधि र कर्मचारीले उठाउँदा स्थानीयहरु हात बाँधेर बस्ने र उल्टै खिल्ली उडाउने गरेको प्रमुख जिल्ला अधिकारी भुपेन्द्र थापाले जानकारी दिए । उनले भने, 'नागरिकमा सरसफाईको चेतनाको कमी हैन उनीहरुसँग अपनत्वको भाव छैन । जे गरेपनि हुन्छ भन्ने कुराको हाबी भएको मात्रै हो।' स्थानीय सरकारले सरसफाइमा विशेष जोड दिएपनि स्थानीयलाई नै अग्रसर नगराएसम्म हाम्रो हो र हामीले नगरे कस्ले गर्ने भन्ने भावनाको उत्प्रेरणा नआएसम्म दुनै बजार सुन्दर नहुने प्रजिअ भुपेन्द्र थापाले दाबी गरे ।
सडकको फोहोर भेरीमा
बजारको फोहोर उठाएर किनारामा बगेको भेरी नदिमा फाल्ने गरिएको छ । पसल, होटेल र स्थानीयको घरबाट निष्कने फोहोर सबै भेरीमा लगेर फाल्ने गरिएकोले भेरी पूरै दुर्गन्धित भएको छ ।
अहिलेसम्म फोहोर व्यवस्थापनको कुनै पनि योजना बनाउन नसकेकाले भेरीमा फोहोर बढिरहेको नागरिक समाज डोल्पाका अध्यक्ष शेरबहादुर बुढाले बताए । किनारमा बनेका घरहरुबाट नदीमा ढल मिसाइएकाे छ।
प्रतिक्रिया दिनुहोस !
