काठमाडौं : फिल्म ‘रुमालै छ चिनो’ आगामी शुक्रबारबाट प्रदर्शनमा आउने भएको छ। भारतीय सेनाका तर्फबाट पाकिस्तानसँगको युद्ध लडेको गोर्खालीको कथा रहेको फिल्म दिनेश सिंह ठकुरीले निर्देशन गरेका हुन्। फिल्ममा किशोर खतिवडा, सञ्चिता लुइँटेल, सुशान्त कार्की, अप्सना थापालगायतका कलाकारको अभिनय रहेको छ। चन्द्रबहादुर खड्काको लगानी रहेको चलचित्रमा दीपक ढकाल र रामप्रसाद पाण्डे सहनिर्माता छन्।
अभिनेत्री अप्सनाले यो फिल्मबाट आफूले ठूलो अपेक्षा राखेको बताएकी छन्। उनले फिल्ममा आफू गाउँको युवतीको भूमिका रहेको जानकारी दिइन्। यसपटक भने प्रचारका लागि समेत हिँड्न पाएकोमा उनले खुसी व्यक्त गरिन्। यो फिल्ममा सबैतिरबाट सहयोग पाएको र फिल्म पनि राम्रो बनेको उनको भनाइ छ। उनले श्रीमान् वा प्रेमी लाउरे भएर विदेश जाँदा स्वदेशमा श्रीमती वा प्रेमिकाले भोग्ने दुःखको कथा फिल्ममा छ।
निर्देशक ठकुरीले विदेशमा हुने युद्धमा नेपाली वीर गोर्खालीले देखाएको वीरताको कथामा फिल्म निर्माण भएको बताए। अध्ययन गरेर मात्र फिल्म बनाएको उनको भनाइ छ। विनोद सापकोटाले फिल्म खिचेका हुन्। यो फिल्ममा समावेश ‘एक माया’ बोलको गीत अहिले चर्चामा छ।
प्रतिक्रिया दिनुहोस !
