काठमाडौँ : राष्ट्रिय प्रजातन्त्र पार्टीका अध्यक्ष कमल थापाले लोभ लालच र प्रलोभनमा पारेर गरिने धर्म परिवर्तन तत्काल रोक्न सरकारसँग माग गरेका छन् । पार्टीको भातृ संगठन नेपाल सनातन धर्म संस्कृति संगठन केन्द्रीय कार्यालयको राजधानीको तीनकुनेमा उद्घाटन गर्दै अध्यक्ष थापाले यस्तो बताएका हुन् ।
'लोभ, लालच र प्रलोभनका आधारमा गरिएको धर्म परिवर्तन तत्काल रोकिनु पर्छ', थापाले भने, 'यसतर्फ सरकारको गम्भीर ध्यानाकर्षण हुनु जरुरी छ।'
नेपाल हिन्दु, बौद्ध र किराँत धर्मको उद्गमस्थल भएको बताउँदै थापाले धार्मिक मूल्य, मान्यता र आस्थाको आधारमा नेपाललाई विश्वकै जेठो र सम्पन्न मुलुकका रुपमा चित्रित गरे ।
अध्यक्ष थापाले अबको एजेन्डा राष्ट्रिय एकता र पहिचानको संरक्षण भएको विचार राखे । 'मुलुक बनाउन हामीसँग अत्यन्त बलियो मुल्य-मान्यता छ', थापाले भने, 'आफ्नो देशको गौरवशाली इतिहास र पहिचान जोगाउन नयाँ पुस्ता अग्रसर हुनु जरुरी छ ।'
थापाले वैदिक मुल्य मान्यताका आधारमा काम गर्दै धर्मलाई समाज र देश विकासमा जोड्न सके सकारात्मक सन्देश दिन सकिने उल्लेख गरे । कार्यक्रममा पार्टीका कोषाध्यक्ष उद्धव पौडेल र सहायक महामन्त्री राजाराम बर्तौला लगायत उपस्थित थिए ।
कार्यक्रममा संगठनका अध्यक्ष पुष्पराज पुरुषले संगठनलाई मुलुककै बलियो धार्मिक संगठन बनाउन लागि पर्ने प्रतिवद्धता व्यक्त गरे । त्यस अवसरमा संगठनका महासचिव सुजन अधिकारी र शास्त्री सुजन पराजुली लगायतले बोलेका थिए ।
प्रतिक्रिया दिनुहोस !
