एकीकृत कसुरमा पहिलो फैसला, अभियुक्तलाई ३७ वर्ष कैद
विराटनगर : जिल्ला अदालत मोरङले नयाँ मुलुकी अपराध संहिता ऐन लागू भएपछि एकीकृत कसुरमा पहिलो फैसला गरेको छ ।
ऐनको फौजदारी कार्यविधि लागु भएपछि एकीकृत कसुर अन्तर्गतको कर्तब्य ज्यान र ज्यान मार्ने उद्योगको दावी गरिएको मुद्दामा एकजना प्रतिवादीलाई अदालतले ३७ वर्ष ६ महिना कैदको फैसला सुनाएको हो ।
भदौ १ गतेबाट ऐन लागू भएपछि एकीकृत कसुरमा प्रतिवादीलाई यति धेरै वर्ष कैद सजायको पहिलो र ऐतिहासिक फैसला सुनाइएको अदालतले जनाएको छ । जिल्ला अदालत मोरङका मुख्य न्यायाधीश राजुकुमार खतिवडाको इजलासले विराटनगर महानगरपालिका–१७ का १९ वर्षीय चुन्नु भनिने बब्लु सिंहलाई ३७ वर्ष ६ महिनाको कैद सजाय सुनाएको हो ।
सिंहलाई प्रहरीले पक्राउ गरेर कर्तब्य ज्यान र ज्यान मार्ने उद्योग अन्तर्गतको एकीकृत कसुरमा मुद्दा चलाएको थियो । बब्लुले धारिलो हतियार तरवार प्रहार गरेर आफ्ना झड्केला बुवा शशी सिंहको गत मंसिर २७ गते राति हत्या गरेका थिए ।
झड्केला दाजु मोहम्मद आकाश आलमलाई पेटमा तरवार प्रहार गरेर गम्भीर घाइते बनाएका थिए । मादक पदार्थ सेवन गरेर झड्केला दाजुसँग झगडा गरिरहेका बेला छुट्याउन पुगेका बुवा शशीको तरवार प्रहार गरेर बब्लुले हत्या गरेको र दाजुलाई घाइते बनाएको प्रहरीले जनाएको छ ।
प्रहरीले घटनाको अनुसन्धान सकेर मिसिल बुझाएपछि सरकारी वकिल कार्यालय मोरङले गत पुस २२ गते उनीविरुद्ध कर्तब्य ज्यान र ज्यान मार्ने उद्योग अन्तर्गतको एकीकृत कसूरमा अदालतमा मुद्दा दर्ता गरेको थियो । अदालतले उनलाई त्यतिबेला तत्काल प्राप्त प्रमाणका आधारमा पुर्पक्षका लागि थुनामा राखेर घटनाको अनुसन्धान अघि बढाउन आदेश दिएको थियो ।
अदालतका स्रेस्तेदार ईश्वरमणि ओझाका अनुसार बब्लुलाई ३७ वर्ष ६ महिना कैद सजायको फैसला सुनाएको न्यायाधीश खतिवडाको इजलासले फैसलाको पूर्ण पाठ आएपछि बिहीबार त्यसलाई प्रमाणीकरण गरिदिएको हो । प्रचलित कानुनमा भएको व्यवस्था बमोजिम माघ २४ गते अदालतले कसूर ठहर गरेको र माघ २९ गते मुद्दाको अन्तिम सजाय निर्धारण गरेको ओझाले जानकारी दिए । उनका अनुसार अहिलेको कानुनी व्यवस्था अनुसार कसुर ठहर भएको ३० दिन भित्रमा सजाय निर्धारण गरिसक्नु पर्छ ।
नयाँ ऐनमा कुनै कसुरदारले एकै पटक एउटै वारदातमा एकभन्दा बढी कसुर गरेमा अधिकतम सजाय हुने कसुरको डेडी सजाय (पूरा सजायमा आधा थप गरेर) हुने कानुनी व्यवस्था छ । ऐनले जन्मकैदमा अधिकतम सजाय २५ वर्ष हुने व्यवस्था गरेको छ ।
सोही व्यवस्था अनुसार बब्लुलाई कर्तब्य ज्यान मुद्दामा २५ वर्षको जन्म कैद र ज्यान मार्ने उद्योग मुद्दामा १२ वर्ष ६ महिना गरेर कूल ३७ वर्ष ६ महिना कैदको सजाय अदालतले सुनाएको स्रेस्तेदार ओझाले बताए । उनले नयाँ मुलुकी अपराध संहिता ऐन लागू भएपछि एकीकृत कसुरमा जिल्ला अदालत मोरङबाट पहिलो र सबैभन्दा बढी कैद सजायको फैसला भएको बताए ।