एनसेलका कर्मचारीलाई सीडीओले सोधे-‘किन घटनाको सूचना नदिएको ?

ललितपुर : एनसेल मुख्यालय लक्षित बम विस्फोटको सूचना सुरक्षा निकायलाई नगराएको भन्दै जिल्ला प्रशासन कार्यालय ललितपुरले असन्तुष्टि जनाएको छ । यस्ता घटनाको जानकारी तत्काल प्रहरीलाई खबर गर्नुपर्ने भए पनि सम्बन्धित पक्षले जानकारी नदिएको भन्दै सीडीओ कार्यालयले गम्भीर रूपमा लिएको हो ।

एनसेलका कर्मचारी सुरक्षा माग गर्दै आइतबार ललितपुर सीडीओ कार्यालय पुगेपछि सीडीओ प्रेमराज जोशीले विस्फोटको खबर सुरक्षा निकायलाई किन नगरेको भनि सोधेका थिए । जोशीका अनुसार विस्फोट साँझ करिब ८ बजे भएको थियो । उनी धनगढीबाट आइपुगेका मात्र थिए । ‘अन्तैबाट घटनाको जानकारी पाएपछि सवा ८ तिर घटनास्थल पुगेँ’, उनले गम्भीर घटनामा पनि प्रहरी प्रशासनलाई सूचना नदिएको असन्तुष्टि व्यक्त गर्दै भने, ‘समयमा खबर गरेको भए ठूलो क्षति नहुन सक्थ्यो । म आफैं त्यहाँ पुगेँ तर जानकारी नै गराएनन् ।’

एनसेल कार्यालयको सुरक्षा प्रमुख महेन्द्रकुमार भट्टचन छन् । उनी पूर्वसशस्त्र प्रहरी हुन् । मूलद्वारमा खटिएका सुरक्षा गार्ड पूर्वसैनिक भएकाले यस्ता घटनाबारे सचेत हुनुपर्ने उनको भनाइ छ । अनुसन्धानका लागि सुरक्षागार्डलाई नियन्त्रणमा लिइएको थियो । भैंसेपाटीतिरबाट ४ वटा मोटरसाइकलमा आएका व्यक्तिले विस्फोट गराएको सीसीटीभी फुटेजमा देखिएको उनले बताए ।

‘थोरै मात्र सतर्कता अपनाएको भए सर्वसाधारणले ज्यान गुमाउनुपर्ने थिएन ।’यसैबीच नेपाल मानव अधिकार संगठनले बम विष्फोट घटनाको भत्र्सना गर्दै अपराधीलाई कारबाही गर्न सरकारसमक्ष माग गरेको छ । हिंसात्मक घटनाले आम नागरिकमा त्रास फैलाउने काम भएको र मुलुकमा पुनः हिंसाले ठाउँ लिन खोजेको भन्दै संगठनका अध्यक्ष ईन्द्रप्रसाद अर्यालले विज्ञप्ति जारी गरी बताएका छन् ।