सरकारी आयोजना ११ वर्षदेखि अधुरै, निजी लक्ष्यभन्दा पहिले
फागुन २५, २०७५ शनिबार २०:२२:०
मकवानपुर : सरकारी विद्युत् आयोजना कुलेखानी तेस्रो निर्माण सुरु भएको आठ वर्षपछि निर्माण थालेको निजी क्षेत्रको माण्डु हाइड्रोको निर्माण कार्य सकिएको छ । तर कुलेखानी तेस्रोबाट अझै पनि विद्युत् उत्पादन हुन सकेको छैन ।
मकवानपुरको भीमफेदी गाउँपालिकाको सानुटारस्थित १४ मेगावाट क्षमताको कुलेखानी तेस्रो निर्माणका केही काम अझै बाँकी रहे पनि भीमफेदीकै इपापन्चकन्यामा २२ मेगावाट विद्युत् क्षमतको माण्डु हाइड्रोको निर्माण सकिएको हो ।
शनिबारदेखि बाँधमा पानी जम्मा गर्न सुरु गरिएको बताउँदै आयोजनाका इन्चार्ज मनोज सिंहले एक साताभित्र परीक्षण उत्पादन सुरु हुने बताए । उक्त आयोजना निर्माणसँगै वागमतीको फोहर पानीको पनि सदुपयोग हुने भएको छ ।
माण्डु हाइड्रोपावर लिमिटेड पवद्र्धक रहेको उक्त आयोजनाबाट आजदेखि ६६ केभी प्रशारण लाईन चार्जको लागि विद्युत् उत्पादनको काम सुरु हुने आयोजनाका इन्चार्ज सिंहले बताए ।
प्रशारण लाईन चार्जको समयमा आयोजनाले भीमफेदी गाउँपालिकाको ५, ६, ७ र ८ नम्बर वडाको इपापञ्चकन्यादेखि बगरबेंसी पावरहाउसम्म पशु चौपाया नछाड्न तथा जथाभावी नहिँड्न भनेको छ ।
यहाँबाट उत्पादित विद्युत् कुलेखानी प्रथमको सबस्टेसन धोर्सिङबाट राष्ट्रिय प्रसारण लाईनमा जोडिने छ । आयोजनाको पावरहाउसबाट साढे १३ किलोमिटरको दूरीमा रहेको कुलेखानी प्रथमको सबस्टेसनसम्म उत्पादित विद्युत् पु¥याउन ४४ वटा टावर निर्माण गरिएको छ ।
दुई साताभित्र नियमित विद्यत् उत्पादन सुरु हुने आयोजनाका इन्चार्ज सिंहले जानकारी दिए । ‘परीक्षण उत्पादनपछि हामी नियमित उत्पादनमा जान्छौँ, त्यसको लागि करिब १५ दिनको समय लाग्छ’, उनले भने ।
सिइच्वाङ हेइच्वाङ चाइनिज कम्पनी र माण्डु हाइड्रोपावर कम्पनीले २०७२ बैशाखबाट आयोजनाको निर्माण सुरु गरेको थियो । करिब चार अर्बको लगानीमा चार वर्षभित्रै आयोजनाको निर्माण कार्य सकिएको हो ।
कुलेखानी तेस्रो अन्तिम चरणमा
१४ मेगावाट क्षमताको सरकारले निर्माण गरिरहेको कुलेखानी तेस्रोको निर्माणकार्य अन्तिम चरणमा रहेको आयोजना प्रमुख सुभाष मिश्रले बताए । निर्माण संरचनाका कामहरु अन्तिम चरणमा रहेको बताउँदै पूर्वाधार परीक्षणको कामपछि परीक्षण उत्पादन सुरु हुने बताए । २०६४ चैतदेखि काम सुरु गरिएको उक्त आयोजना २०६८ सालमा सम्पन्न गर्ने गरी ठकेदार पक्षसँग सम्झौता भएको थियो ।
विद्युत्गृह निर्माणको ठेक्का पाएको चिनियाँ कम्पनी ‘जेजियाङ जिल्लुन’ र सिभिलतर्फको काम पाएको कम्पनी सिनो हाइड्रोको ढिलासुस्तीको कारण निर्माण सम्पन्न हुन ढिलाइ भएको आयोजना प्रमुख मिश्रले बताए ।
छैटौं पटकसम्म म्याद थप हुँदा एक अर्ब ४७ करोड रुपैयाँमा सक्ने गरी सुरु गरिएको आयोजनाको लागत करिब चार अर्ब ६५ करोड पुगेको आयोजनाले जानएको छ ।
प्रतिक्रिया दिनुहोस !
