युरोपियन च्याम्पियन्स लिग फुटबल : बार्सिलोना र लिभरपुल क्वार्टरफाइनलमा

बार्सिलोना : स्पेनिस क्लब बार्सिलोना र इङ्लिस क्लब लिभरपुल युरोपियन च्याम्पियन्स लिग फुटबलको क्वार्टरफाइनलमा पुगेका छन् । उक्त नतिजासँगै च्याम्पियन्स लिगको क्वार्टरफाइनलमा पुग्ने आठवटै टोलीको टुंगो पनि लागेको छ ।

बार्सिलोनाले बिहीबार बिहान घरेलु मैदानमा खेलिएको प्रिक्वार्टरफाइनलको दोस्रो लेग खेलमा फ्रान्सेली प्रतिद्वन्द्वी लियोनलाई ५—१ गोलले हरायो । सोही कुल गोल भिन्नताका आधारमा बार्सिलोना अगाडि बढेको हो । यसअघि लियोनको घरेलु मैदानमा खेलिएको पहिलो लेग खेल गोलरहित बराबरीमा सकिएको थियो ।

लिभरपुल भने प्रिक्वार्टरफाइनलको दोस्रो लेग खेलमा बलियो जर्मन प्रतिद्वन्द्वी बायर्न म्युनिखलाई उसैको घरेलु मैदानमा ३—१ ले हराउँदै सोही कुल गोल भिन्नताका आधारमा अगाडि बढेको हो । यसअघि लिभरपुलको घरेलु मैदानमा खेलिएको पहिलो लेग खेल गोलरहित बराबरीमा सकिएको थियो ।

लियोनविरुद्धको खेलमा बार्सिलोनाका लागि अर्जेन्टिनी स्टार लियोनल मेसीले दुई गोलको योगदान गरेका थिए । खेल सुरु भएको १८औं मिनेटमै मेसीले पेनाल्टीमार्फत पहिलो गोल गरे । ३१औं मिनेटमा फिलिप कोउटिन्होले टोलीको अग्रता दोब्बर बनाए । उनले लुइस स्वारेजको पासमा गोल गरेका हुन् ।

यसैगरी ५८औं मिनेटमा लियोनका लुकास टुसार्टले जवाफी गोल फर्काए । ७८औं मिनेटमा मेसीले व्यक्तिगत रुपमा दोस्रो गोल थपे । ८१औं मिनेटमा जेरार्ड पीकेले बार्सिलोनालाई ४—१ को बलियो स्थितिमा पुर्‍याए ।

निर्धारित समयको खेल सकिनुभन्दा चार मिनेटअघि ओसमेन डेम्बेलले बार्सिलोनाका लागि पाँचौं गोल गरेका थिए । आफैले दुई गोल गरेका मेसीले थप दुई गोलका लागि पास पनि उपलब्ध गराएका थिए । बार्सिलोना कीर्तिमानी रुपमा लगातार १२औं पटक च्याम्पियन्स लिगको क्वार्टरफाइनलमा पुगेको हो ।

च्याम्पियन्स लिगको क्वार्टरफाइनल खेल तालिका शुक्रबार राति सार्वजनिक गरिने छ । लिभरपुल यो सिजन च्याम्पियन्स लिगको क्वार्टरफाइनलमा पुग्ने चौथो इङ्लिस क्लब बनेको छ । इङ्लिस क्लब म्यानचेस्टर सिटी, म्यानचेस्टर युनाइटेड र टोट्टनहाम यसअघि नै क्वार्टरफाइनलमा पुगिसकेका छन् । यसदेखि बाहेक इटालियन क्लब युभेन्ट्स, डच क्लब आयाक्स र पोर्चुगिज क्लब एफसी पोर्टो पनि क्वार्टरफाइनलमा पुगेका छन् ।

घरेलु मैदानमा खेलिएको च्याम्पियन्स लिगको पछिल्ला ३० खेलमा बार्सिलोना अपराजित रहँदै आएको छ । तिमध्ये २७ खेल बार्सिलोनाले जितेको छ भने तीन खेल बराबरीमा सकिएको छ । च्याम्पियन्स लिगमा यो सबैभन्दा लामो अपराजित यात्रा हो ।

यसैगरी बायर्न म्युनिखविरुद्धको खेलमा लिभरपुलका लागि साडियो मानेले दुई गोलको योगदान गरेका थिए । खेल सुरु भएको २६औं मिनेटमा पहिलो गोल गरेका मानेले ८४औं मिनेटमा व्यक्तिगत दोस्रो गोल थपेका थिए ।

लिभरपुलका लागि अर्को एक गोल भने ६९औं मिनेटमा भिर्जिल भान जिकले गरेका थिए । खेलको ३९औं मिनेटमा लिभरपुलका जोल माटिपबाट एउटा आत्मघाति गोल भएको थियो । लिभरपुल लगातार दोस्रो पटक च्याम्पियन्स लिगको क्वार्टरफाइनलमा पुगेको हो । सन् २०१०/११ सिजनपछि पहिलो पटक बायर्न म्युनिख च्याम्पियन्स लिगको क्वार्टरफाइनलमा पुग्न असफल बनेको हो ।