नेपालगन्ज : नेपालगन्ज रंगशालाको भीआईपी प्यारापिटको सामान होलीपछि मात्र नेपालगन्ज आइपुग्ने भएको छ । भारतको उत्तर प्रदेशमा पर्ने सीमावर्ती बजार रुपैडिहादेखि दुई किलोमिटरको दुरीमा रहेको जैतापुर ग्रामसभाको जैतापुर गाउँमा कलकत्ताबाट ल्याइएका प्यारापिटका कन्टेनर दुई दिनदेखि अलपत्र छन् ।
कलकत्ताबाट आउँदै गर्दा उत्तर प्रदेशको गाजिपुरमा पुल भत्केका कारण १५ घण्टा कन्टेनर जाममा परेका हुन् । त्यसपछि बनारस, जोनपुर, आजमगढ, बहराइच हुँदै कन्टेनरहरु रुपैडिहा ल्याइएको थियो । कन्टेनर बोकेको एनएलओ १ जी ४५४९ नम्बरको गाडीका चालक लाल बिहारी मौर्यले दुई सय किलोमिटर घुमेर आएको बताए । ‘झन्डै दुई सय किलोमिटर उल्टो घुमेर आउँदा एक दिन ढिलो भयो’ उनले भने ।
काठमाडौंको सुनकोशी वल्र्ड वाइड जेभीले मलेसियन कम्पनीबाट चीनमा निर्मित भीआइपी प्यारापिटका सामान कलकत्ताबाट मल्लिक सिपिङ कम्पनीले सी ब्रिज ट्रान्सपोर्टमार्फत १४ मार्चको बिहान एक बजे नेपालगन्जका लागि पठाएको थियो । पहिलो चरणमा ६ वटा कन्टेनर आउनु पर्नेमा जैतापुरमा पाँच वटा मात्र कन्टेनर आएका छन् । यी कन्टेनर होलीपछि मात्र भन्सारको प्रक्रियामा आउने ठेकेदार कम्पनी काठमाडौंको सुनकोशी वल्र्ड वाइड जेभीका नारायण भट्टराईले जानकारी दिए ।
सबै कन्टेनर एक साथ नआउँदा भारतीय भन्सारले काम अघि बढाउँदैन । ‘भन्सार तिर्न भारतीय कम्पनीसँग एलसीमार्फत कारोबार हुने हो । मंगलबार बैंकको काम हुन सकेन । बुधबार बैंक बिदा हुन्छ । आइतबार मात्र बैकिङ कारोबार हुनेछ’ भट्टराईले अन्नपूर्णसँग भने ।
सबै कन्टेनर आउँदा मात्र होलीपछि भन्सारको प्रक्रिया अघि बढ्नेछ । यस्तो सामान पहिलो पटक आएकाले भन्सार दर के हुने भन्ने विषयले पनि केही दिन भन्सारको प्रक्रिया लम्बिने देखिएको छ ।
कलकत्ताबाट ल्याइएका कन्टेनर नेपालगन्ज रंगशालामा पु¥याउन कठिन छ । एनएलओ १ के ७२८० नम्बरको गाडीका चालक चन्द्रेश मौर्य भन्छन्, ‘लम्बाइ ६० फिट र अग्लो साढे १६ फिट छ । यस्तो गाडी आउट रोडमा जान सक्दैन ।’ यस्तै विभिन्न प्रक्रियाका कारण भीआइपी प्यारापिट निर्माणमा ढिलो हुने देखिएको छ ।
प्रतिक्रिया दिनुहोस !
