विराटनगर : विराटनगर महानगरपालिका र निर्माण कम्पनीले सडक निर्माणको काम अलपत्र छाडिदिँदा प्रदेश १ को अस्थायी राजधानी विराटनगर अस्तव्यस्त बनेको छ । जथाभावी सडक खन्ने तर महिनौंसम्म काम सुरु नगर्दा यात्रुले सास्ती खेप्नु परेको छ ।
विराटनगर महानगरपालिकाले पाँचौं साफ महिला च्याम्पियनसिप अघि नै निर्माण सक्ने भन्दै दुई महिनाअघि मुख्य बजारको सडकमा ढल बिच्छ्याउने काम सुरु गरेको थियो । साफ च्याम्पियनसिपको समूह चरणका खेल सकिए पनि महानगरले मुख्य सडकमा ढल बिच्छ्याउने काम सम्पन्न गर्न सकेको छैन । वैकल्पिक सडक नहुँदा विराटनगरको व्यस्त बजार मेनरोड भद्रगोल छ । विराटनगरको व्यस्त बजार मेनरोडसहितका सडक जथावाही खनिँदा बजार क्षेत्र भद्रगोल बनेको हो ।
विराटनगरको उत्तर दक्षिण सडकको तीनपैनी चोकदेखि ट्राफिक चोकसम्मको खण्डलाई मुख्य बजार मानिन्छ । अधिकांश पसल तीनपैनी ट्राफिक चोक खण्डमा छन् । करिब दुई किलो मिटरको बजार क्षेत्रलाई जोड्ने पूर्वतर्फ ८ र पश्चिमतर्फ ९ वटा सडक छन् ।
बजार जोड्ने सडकको काम नसकी महानगरले मुख्य सडक खनेपछि सर्वसाधारणलाई अस्पतालसम्म पुग्न गाह्रो भएको छ । कछुवा गतिमा काम हुँदा सर्वसाधरणले सास्ती व्यहोर्नु परेको स्थानीयको गुनासो छ ।
एसियाली विकास बैंकको ऋण सहयोगमा क्षेत्रीय सहरी विकास परियोजनाअन्तर्गत विराटनगर महानगरपालिका भित्रका सडक कालोपत्रे गर्ने काम सुरु भएयता अस्तव्यस्त बनेको हो । महानगर भित्रका ७४ किलोमिटर सडकमा कालो पत्रेको काम सुरु भएको छ । २ अर्ब ६३ करोड रुपैयाँ लागतमा सम्पन्न गर्ने लक्ष्यका साथ काम सुरु गरेपनि यात्रुको चाप बढी हुने सडकको वैकल्पिक बाटो समेत खनेर छोडेकाले सास्ती बेहोर्नु परेको स्थानीयले गुनासो गरेका छन् । चाईनिज कम्पनी झोङ झयाङले ठेक्का लिएर विराटनगरको आशिष निर्माण सेवाले काम सुरु गरेको छ । यातायात सञ्चालनका लागि बाइपास सडक नछाडी ढलको पाइप बिच्छ्याउन अन्दाधुन्ध खनिएपछि बजार क्षेत्र अस्तव्यस्त बनेको व्यापारी गंगा साहले बताए ।
विराटनगर रानी–धरान ६ लेन सडकको काम पनि निर्माणधिन अवस्थामा छ । महानगरका सबै मुख्य सडक भत्काइँदा ट्राफिक जाम पनि बढेको छ । विराटनगर महानगरपालिकामा एशियाली विकास बैंकको सहयोगमा क्षेत्रीय शहरी विकास परियोजना सञ्चालित छ । बैंककै सहयोगमा सञ्चालित एकीकृत शहरी वातावरणीय सुधार परियोजनामार्फत काम सम्पन्न नभए पछि आएको क्षेत्रीय शहरी विकास परियोजनाले एक वर्षयता काम गरिरहेको छ ।
एक वर्षअघि सुरु भएको परियोजनाको काम समयमा नै सक्न बजार क्षेत्रमा एकै पटक ढल बिच्छ्याउने काम सुरु गरिएको महानगरका मेयर भीम पराजुलीले बताए । उनले असारसम्म ढल बिछ्याउने काम सकिने गरी काम सुरु गरेको बताउँदै भने, ‘पाइप बिच्छ्याउने काम सकेर कालोपत्रेको काम गर्छाै ।’
प्रतिक्रिया दिनुहोस !
