ब्रसेल्स : युरो कप फुटबको छनोट खेलमा बेल्जियमले सुखद सुरुआत गरेको छ । बेल्जियमले शुक्रबार बिहान खेलिएको आफ्नो पहिलो छनोट खेलमा रुसमाथि ३—१ गोलको जित हासिल गर्यो । युरो कपको आगामी संस्करण सन् २०२० मा आयोजना हुँदैछ ।
समूह ‘आई’ अन्तर्गतको छनोट खेलमा बेल्जियमका लागि घरेलु मैदानमा अनुभवी खेलाडी इडेन हाजार्डले दुई गोलको योगदान गरे । इङ्लिस क्लब चेल्सीबाट ब्यवसायिक फुटबल खेल्ने हाजार्डले पहिलो हाफको खेल सकिनुभन्दा ठिकअघि पेनाल्टीमार्फत गोल गर्दै खेललाई १—१ को बराबरीमा ल्याएका थिए ।
त्यसअघि खेल सुरु भएको १४औं मिनेटमा युरी टेलिम्यान्सले बेल्जियमलाई अग्रता दिलाएका थिए । त्यसको दुई मिनेटपछि नै रुसका लागि डेनिस चेरिसेभले जवाफी गोल फर्काएका थिए । बेल्जियमका लागि तेस्रो गोल भने हाजार्डले ८८औं मिनेटमा थपेका थिए ।
खेलको अन्तिम समयमा रुसका एलेक्जेन्डर ग्लोभिन दोहोरो पहेँलो कार्ड पाउँदै मैदानबाट बाहिरिएका थिए । रुसमा सम्पन्न विश्वकपमा पनि बेल्जियम सेमिफाइनलसम्म पुगेको थियो । बेल्जियमले आगामी आइतबार साइप्रससँग युरो कपको दोस्रो छनोट खेल खेल्ने छ ।
समूह ‘आई’ अन्तर्गतकै अन्य खेलमा कजाकस्तानले घरेलु मैदानमा स्कटल्यान्डलाई ३—० गोलले पराजित गर्यो । साइप्रसले पनि घरेलु मैदानको फाइदा उठाउँदै तुलनात्मक रुपमा कमजोर प्रतिद्वन्द्वी सन मारिनोलाई ५—० गोलले हरायो ।
पहिलो चरणको खेलको समाप्तिपछि समान तीन अंक बटुले पनि गोल अन्तरका आधारमा साइप्रस पहिलो, कजाकस्तान दोस्रो र बेल्जियम तेस्रो स्थानमा छन् ।
प्रतिक्रिया दिनुहोस !
