पोखरा : पोखरा उपत्यका नगर विकास समिति अध्यक्ष तथा पर्यटन व्यवसायी सुन्दरकुमार श्रेष्ठ बालिका बलात्कार आरोपमा शुक्रबार पक्राउ परेका छन् । आफ्नै होटल कान्तिपुरको छिमेकीकहाँ बस्दै आएकी १६ वर्षीया बालिकालाई गएको भदौदेखि बलात्कार गर्दै आएको आरोप उनीमाथि लागेको छ ।
श्रेष्ठसहित बैंकर सुवास सुवेदीलाई पनि तिनै बालिकामाथि यौन दुर्व्यवहारको आरोपमा कास्की प्रहरीले पक्रेको छ । शुक्रबार पक्राउ परेका श्रेष्ठ र सुवेदी दुवैलाई कास्की प्रहरीले हिरासतमा राखेर अनुसन्धान अघि बढाएको छ । बालिकासँग प्रारम्भिक बयान लिएपछि श्रेष्ठ र सुवेदीलाई पक्राउ गरेको जिल्ला प्रहरी कार्यालय कास्कीका अधिकारीले पुष्टि गरेका छन् ।
आफू बस्दै आएका घरबाट बिहीबार बालिका हराएपछि संरक्षकले खोजीका लागि प्रहरीमा निवेदन गरेका थिए । शुक्रबार बिहान फेवाताल किनारतिर भेटिएकी बालिकाले आफूलाई मर्न मन लागेको बताएकी थिइन् । मर्न मन लाग्नुको कारण खोतल्दै जाँदा बलात्कारको पीडा भन्ने खुलेको थियो । श्रेष्ठ पोखरा पर्यटन परिषद् र क्षेत्रीय होटल संघ पोखराका पूर्वअध्यक्ष हुन् । श्रेष्ठ २०७४ जेठमा पोखरा उपत्यका नगर विकास समिति अध्यक्ष नियुक्त भएका थिए ।
प्रतिक्रिया दिनुहोस !
