काठमाडौं : नेकपा वरिष्ठ नेता एवं पूर्वप्रधानमन्त्री झलनाथ खनाल चैत ५ देखि ७० वर्षमा लागे । उमेर सात दशक पुगेको अवसरमा उनले नयाँ जुक्ति निकाले– एकल शब्द रचनामा दोस्रो गीति एल्बम बजारमा ल्याउने ।
यसकै अवसर जुरेको थियो, शनिबार । कमलादीस्थित नेपाल प्रज्ञा–प्रतिष्ठानको हलमा कार्यक्रम आयोजना गरिएको थियो । प्रमुख अतिथि थिए, प्रधानमन्त्री एवं नेकपा अध्यक्ष केपी ओली । पार्टीका शीर्ष नेताको बाक्लो उपस्थितिसँगै खचाखच दर्शकका अगाडि खनाल बोले, ‘म ७० वर्ष पुगें । तपाईंहरूलाई विश्वास लाग्दैन होला तर म अझै ५०–६० तिरै छु जस्तो लाग्दै छ ।’
उनी २००६ सालमा इलाममा जन्मिएका हुन् । उनलाई ७० वर्षमा पाइला टेकेको विश्वास लागेको रहेनछ । उनले आफ्ना नौ गीत संग्रहित ‘परिवर्तनका स्वरहरू–२’ लोकार्पण कार्यक्रममा ‘तन्नेरीपन’ देखाउन खोजे । ‘म अझ कम्तीमा १५ वर्ष युवा अवस्थामै रहन्छु जस्तो लाग्छ’, उनले भने । उनले यसो भनिरहँदा हल हाँसोले गुञ्जिएको थियो ।
खनालपछि बोल्ने पालो आयो प्रधानमन्त्री ओलीको । उनी के कम ! उनले सुरुमै खनालको युवा मनको प्रशंसा गदै दर्शकलाई हँसाए । ‘गीतकार मात्रै होइनन् जेएन कमरेड, यो कार्यक्रमका पनि रचनाकार हुनुहुन्छ’, उनले भने, ‘युवा मनका, जन्मले जन्तरे, कवि÷गीतकार झलनाथ खनाल नेता त भन्नै परेन । पार्टीका पूर्वअध्यक्ष भइसक्नुभएका, पूर्वप्रधानमन्त्री भइसक्नुभएका र लामो समय पार्टीलाई नेतृत्व गरेका व्यक्ति हुनुहुन्छ ।’
खनालले २०६२÷६३ को आन्दोलनपछि ‘अभूतपूर्व अवसर’ आएको उल्लेख गरेका थिए । सरकारको नेतृत्वकर्ताले राजनीतिक र आर्थिक क्रान्तिसँगै सांस्कृतिक क्रान्ति पनि अघि बढाउनुपर्ने सुझाव उनले दिएका थिए ।
यसको जवाफमा ओलीले खनालतर्फ फर्किएर भने, ‘निःसन्देह एउटा राजनीतिज्ञ बहुआयामिक रूपमा प्रस्तुत हुनुभएको छ । अब हामी ढुक्कै भए हुन्छ, अझै केही वर्ष युवा (झलनाथ) हुन्छु भन्नुभएको छ । उहाँ युवा भएपछि रचना कमी हुँदैन, अर्काे एल्बम छिट्टै आउँछ ।’
सरकारको अबको यात्रा विकास र समृद्धि भएकाले त्यसलाई जगाउने गीतसंगीत हुनुपर्ने उनको भनाइ थियो । भुइँचालोको सवाईजस्तो नभई गीतसंगीतले विकासका लागि मर्गदर्शन गर्नुपर्ने धारणा उनले व्यक्त गरे । उनले नेकपा र सरकारलाई ‘आकर्षक नाम’बाट अलमलिने छुट नभएको पनि बताए । जनअपेक्षाअनुसार सरकार आफ्नो जिम्मेवारीमा गम्भीर रहेको उनले उल्लेख गरे । उनले दिन–दिनै नयाँ योजना बनाउँदै सरकार अघि बढिरहेको बताए ।
खनालको गीति एल्बम जनसांस्कृतिक महासंघले बजारमा ल्याएको हो । एल्बमका गीतमा मिलन तिमल्सिनाले संगीत भरेका छन । यम बराल, खुमन अधिकारी, पूर्णकला बीसी, मिलन नेवार, धीरेन्द्र लकान्द्री, अञ्जु घिमिरे, दीपक लिम्बूलगायतले स्वर दिएका छन् ।
प्रतिक्रिया दिनुहोस !
