आठ वर्षीया बालिकालाई बलात्कार गर्न खोजेको आरोपमा भारतीय युवक पक्राउ
चैत १४, २०७५ बिहीबार १६:५०:०
ललितपुर : ललितपुरको महालक्ष्मी नगरपालिका–९ मा आठ वर्षीया बालिकालाई बलात्कार गर्न खोजेको आरोपमा एकजना २६ वर्षीय युवक पक्राउ परेका छन् ।
भारतको बिहार राज्यको मंगुर जिल्ला स्थायी घर भइ लुभुमा बस्दै आएका रञ्जन मण्डलले फागु पुर्णिमाको दिन बालिकालाई जबरजस्ती करणी गर्ने प्रयत्न गरेको उजुरीमा छ ।
घटनापछि फरार रहेका मण्डललाई महानगरीय प्रहरी वृत्त सातदोबाटोले १० गते पक्राउ गरेको थियो । वृत्तका डीएसपी गौतम मिश्रका अनुसार मण्डल भाग्दै गरेको अवस्थामा टीकाथलीबाट पक्राउ परेका थिए ।
बालिकाका बा–आमा काममा गएको बेला मण्डलले चकलेट दिन्छु भनेर बोकेर लगेको बालिकाका आफन्तको दावी छ । छिमेकीको रुपमा बस्दैआएका मण्डलको हिमचिम पुरानै रहेको पनि बालिकाका आफन्त बताउँछन् ।
मण्डलले बालिकालाई नजिकै बन्दै गरेको एउटा घरको सबैभन्दा माथि (छत) मा लगेर कपडा फुकाउन थालेपछि बालिका त्यहाँबाट आत्तिएर भागेको बताइएको छ ।
घटनास्थलबाट बालिका हतार हतार भाग्दा चप्पल चुँडिएको थियो । मिश्रले भने, ‘बालिकाको चप्पल पनि घटनास्थलबाट बरामत गरेका छौँ ।’ मण्डलको मुद्दामा म्याद थप गरी अनुसन्धान भइरहेको प्रहरीले जनाएको छ ।
प्रतिक्रिया दिनुहोस !
