दाङ : दाङको तुलसीपुर र काठमाडौं दैनिक दुईपटक हवाई उडान हुने भएको छ । यात्रुको चापका कारण नेपाल एयरलाइन्सको विमानले दैनिक दुईपटक उडान गर्ने दाङ–काठमाडौ| कमर्सियल डाइरेक्टर टंकनिधि दाहालले जानकारी दिए ।
अहिले दैनिक एक उडान भर्दै आएकोमा चैत १८ गतेबाट दिनमा दुईपटक हवाई सेवा सञ्चालन गर्ने तयारी भएको दाहालले जानकारी दिए । असोज २७ गतेबाट सातामा दुईवटा उडान भर्दै आएको वायुसेवा निगमको विमानले पुसबाट दैनिक सेवा सञ्चालन गर्दै आएको थियो । लामो समयदेखि बन्द रहेको विमान सेवा सञ्चालन नियमित भएपछि उडान थपेर दैनिक दुईपटक बनाइएको तुलसीपुर उपमहानगरपालिकाका नगर प्रमुख घनश्याम पाण्डेले बताए । उनले एयरलाइन्सको भूमिका सकारात्मक भएको भन्दै स्थानीयले सहज रूपमा हवाई सेवा पाउने बताए ।
विमान सेवा दैनिक दुईपटक सञ्चालन हुने कुराले यहाँका सर्वसाधारण खुसी भएका छन् । ‘एकैदिनमा काठमाडौंको काम सकेर दाङ आउन पाइने भइयो, यसले सबैलाई खुसी बनाएको छ’, स्थानीय व्यवसायी तथा तुलसीपुर उद्योग वाणिज्य संघका अध्यक्ष वीरु रावतले भने । यसले व्यापारीलाई निकै फाइदा पुग्ने उनले बताए । राप्ती अञ्चल यातायात व्यवसायी समितिका अध्यक्ष सुरेश हमालले दैनिक दुईपटक हवाइ सेवा सञ्चालन हुने कुराले उत्साहित बनाएको बताए । उनले आपतकालीन अवस्थामा जिल्लाबाहिरको हवाई मार्ग प्रयोग गर्नुपर्ने बाध्यताको अन्त्य भएको बताए । तुलसीपुर चेम्बर्स अफ कमर्सका अध्यक्ष टोपबहादुर घर्तीले व्यवसायीलाई दैनिक दुईपटक हवाइ सेवा सञ्चालन हुँदा निकै राहत महसुस भएको बताए ।
बन्द अवस्थामा रहेको विमानस्थल सञ्चालनसँगै यात्रु प्रतिक्षालय टर्मिनल भवन निर्माण अन्तिम चरणमा छ । नगर प्रमुख पाण्डेले अन्य निजी विमान कम्पनीले उडानका लागि प्रस्ताव गरेको भन्दै इन्धन डिपो स्थापना भए निजी विमान कम्पनीले उडान भर्ने बताए ।
प्रतिक्रिया दिनुहोस !
