काठमाडौं : आइतबार साँझ ७ बजे । स्थान ः पर्सा, जगरनाथपुर । बिस्तारै अँध्यारो बढ्दै थियो । आकाश रिसाए जस्तो लाग्थ्यो । किनकि साँझ पर्दानपर्दै बादलका टुक्राटाक्रीले ठूलो रूप लिँदै थिए । तर जब रातले अधिकार जमाउन थाल्यो, हावाहुरीसँगै पानी पनि प¥यो । हेर्दाहेर्दै हुरीले वितण्डा मच्चाउन थाल्यो । वरिपरिको केही नदेखिने भयो ।
निमेषमै फुसका घरहरू लड्न थाले । तिनै घरलाई छिमेकीको तीनतले घरले च्याप्यो । मान्छेहरू हाहाकार गर्न थाले । जीउ जोगाउन सबै भागे । तर पाँच वर्षीया समिना खातुन भाग्न सकिनन् । सायद उनले मेसो पाइनन् । र च्याप्पिइन् । अनि रोइन् ।
खातुनका दाईदिदी भनी बुवाआमासँगै पछि लागे । घरबाट अलि परको बाटोमा पुगेका मात्र के थिए, खातुनका बाबु मन्सुरी मियालाई सन्तानको याद आयो । र हेरे । तर कान्छी छोरी समिनालाई देखेनन् । उनी आत्तिए । ‘सबै जना पछिपछि आएका होलान् भन्ठानेको थिएँ’, उनले भने, ‘नदेखेपछि घरतिर हेरें । अन्धकार थियो । धन्न छोरीको रुवाइ सुनें । र त्यही पछ्याउँदै गएँ ।’
खोज्दै जाँदा उनले केही छिन त छोरीलाई भेटाएनन् । तर पनि उनी छामछुम गर्दै अघि बढे । र बल्लतल्ल छोरी भेटे । तर छोरीलाई खरको छानोले च्यापेको थियो । बिस्तारै त्यसलाई पन्छाए । अनि छोरीलाई काखी च्यापे । अनि भागे ।
तीन छोरी र एक छोराका पिता मियाले आइतबार राति आएको आकस्मिक हावाहुरीको कहालीलाग्दो अवस्था सम्झिए, ‘सासले बाँचेको जस्तो लाग्थ्यो । तर त्यहाँको अवस्था हेर्दा बाँचिन्छ भन्ने विश्वास लागेको थिएन ।’ हावाहुरीले २८ जनाको ज्यान लिएको छ । टाउकोमा चोट लागेकी छोरी खातुनको टिचिङ अस्पतालको आकस्मिक कक्षमा उपचार भइरहेको छ । उनको स्वास्थ्य अवस्था सामान्य रहेको उपचार संलग्न चिकित्सकले बताए ।
बाराको भरभरिया गाउँकी ३५ वर्षीया गीतादेवी पटेलले पनि खाना पकाएर राखेकी थिइन् । मजदुरी गरी फर्किएका श्रीमान किशन आराम गरिरहेका थिए । खाना खाने तयारी हुँदै थियो । एक्कासि हुरीबतास बढ्दै आयो । हेर्दाहेर्दै घर भत्कियो । गीतादेवीका दुवै खुट्टा भाँचिए । किसनलाई पनि चोट लाग्यो । ‘पाकेको खाना खाने परको कुरा, ज्यान जोगाउनै सकस भयो’, किसनले भने, ‘पाकेको खाना पनि खान पाइएन ।’
हावाहुरीले घर भत्किएको छ । पटेल दम्पतीसहित तीन वर्षीय छोरा अमनको निधारमा चोट लागेको छ । घाइते भएपछि उनीहरूलाई छिमेकीले उद्धार गरी नारायणी उपक्षेत्रीय अस्पतालमा पु¥याइएको थियो । त्यसपछि थप उपचारका लागि काठमाडौं ल्याइएको हो । सेनाको स्काई ट्रकबाट घाइते भएकामध्ये सात जनालाई शिक्षण अस्पतालको आकस्मिक कक्षमा भर्ना गरिएको छ । तीमध्ये पाँच जना बारा र दुई जना पर्साका रहेको अस्पतालका कार्यकारी निर्देशक डा. प्रेमकृष्ण खड्गाले जानकारी दिए । उपचाररत घाइतेहरू घरवास भत्किएपछि भविष्य सम्झेर चिन्तित छन् ।
१ हजार ४४ जनालाई आकस्मिक सेवा
हावाहुरीमा परी घाइते भएका १ हजार ४४ जनाले आकस्मिक सेवा पाएका छन् । हावाहुरीमा परेर २७ जनाको ज्यान गएको छ । बारा र पर्साका ४ सयभन्दा बढी घाइते भएको स्वास्थ्य तथा जनसंख्या मन्त्रालयले जनाएको छ । नारायणी उपक्षेत्रीय अस्पताल, नेसनल मेडिकल कलेज, तराई अस्पताल वीरगन्ज, कलैया अस्पताल, गण्डकी अस्पताल र वीरगन्ज हेल्थ केयरमा घाइतेहरूको उपचार भइरहेको छ ।
घाइते भएका ३ सय २३ जनाको काठमाडौंलगायत बारा र पर्साका विभिन्न अस्पतालमा उपचार भइरहेको स्वास्थ्य तथा जनसंख्या मन्त्रालयले जनाएको छ । घाइतेमध्ये बाराका ५९ वर्षीय मोहम्मद मिया, ३५ वर्षीया गीतादेवी पटेल, ३८ वर्षीय किशन पटेल, ३ वर्षीय अमन पटेल, ८० वर्षीय सुरेश पटेल, पर्साका ३३ वर्षीय मनोज अन्सारी र ५ वर्षीया समिना खातुनको उपचार भइरहेको डा. खड्गाले जानकारी दिए ।
नेपाली सेनाको एक र प्रहरीका दुई टोली घाइतेको उद्धारमा परिचालित छन् । प्रधानमन्त्री केपी ओलीले बारा र पर्साका हुरीप्रभावित गाउँको स्थलगत निरीक्षण गरेका छन् । उपप्रधान एवं स्वास्थ्य तथा जनसंख्यामन्त्री उपेन्द्र यादवले समेत घटनास्थलको निरीक्षण गर्दै घाइतेको उद्धार र उपचारमा कमी आउन नदिन निर्देशन दिइसकेका छन् । मन्त्रालयबाट डा. रमेश खरेल र डा. दीपेन्द्ररमण सिंहको नेतृत्वमा दुईवटा टोली घटनास्थलतर्फ परिचालन गरिएको छ । त्रिभुवन अन्तर्राष्ट्रिय विमानस्थलमा एम्बुलेन्स सेवा पनि तयारी अवस्थामा राखिएको मन्त्रालयले जानकारी दिएको छ ।
स्वास्थ्य तथा जनसंख्या राज्यमन्त्री सुरेन्द्रकुमार यादवको नेतृत्वमा मन्त्रालयका उच्चपदस्थ पदाधिकारीको बैठक बसेको छ । बैठकले उद्धार र उपचारलाई प्रभावकारी बनाउने निर्णय गरेको छ ।
प्रतिक्रिया दिनुहोस !
