काठमाडौं : भारतको मिजोराम प्रान्तको चाम्फाई जिल्ला मानव बेचबिखनका लागि अर्को प्रस्थान विन्दुको रुपमा देखा परेको छ। भारतको मनिपुरबाट १ सय ७९ जना नेपाली महिलाको उद्धार गरेको केही महिना पनि नबित्दै मानव तस्करहरु पुन: सल्बलाएका छन्।मिजोराम प्रान्तको चम्फाई जिल्ला भारत र म्यानमार बीचको सीमानामा अवस्थित छ। यो नाका भर्खरै मात्र सञ्चालनमा आएको थियो।
भारतीय अधिकारीका अनुसार सो नाका सञ्चालन भएपछि १ सय ९० जना नेपाली चेलीलाई अनधिकृत रुपमा दलालले म्यानमार प्रवेश गराइसकेका छन्।यसमध्ये ७० जना नेपाली महिलालाई भारतीय प्रहरीको सक्रियतामा उद्धार गरिएको छ र उनीहरु स्वदेश फर्किने क्रममा रहेका माइती नेपालले जानकारी दिएको छ।
भारतबाट यसरी एक पछि अर्को नाका हुँदै म्यानमारकै बाटो प्रयोग गरी नेपाली नागरिकको तस्करी हुनु निकै चिन्ताको विषय रहेको माइती नेपालका अध्यक्ष विश्वराम खड्काले बताए।
नेपाल सरकारले यस प्रकारको निकृष्ट अपराधविरुद्ध ठोष कदम चाली यस अपराधमा सम्लग्न अपराधीलाई कानुनी दायरामा ल्याइ पीडितको हक र अधिकार प्रत्याभूत गराउनुपर्नेमा संस्थाले माग गरेको छ।
प्रतिक्रिया दिनुहोस !
