फिदिम : निर्माण सुरु भएको एक दशकपछि काबेली करिडोरको दोस्रो खण्ड व्यवसायिक रुपमा सञ्चालनमा आएको छ। शनिबारदेखि सुरु गरिएको परीक्षण प्रशारण सफल भएपछि १३२ केभीए विद्युत् प्रशारण लाइन मंगलबार साँझदेखि व्यवसायिक रुपमा सञ्चालनमा ल्याइएको हो। दोस्रो खण्ड सञ्चालनमा आएसँगै फिदिमको थापाटार शवस्टेसनदेखि विद्युत जडान गर्न सकिने भएको छ। करिडोर सञ्चालनमा आएपछि यहाँ उत्पादित विद्युत्लाई मुलुकको विद्युत प्रणालीमा जडान गर्न सहज हुने भएको छ।
थापाटार शवस्टेसनमा तत्काल दुईवटा जलविद्युत आयोजनाबाट उत्पादित विद्युत जडान गर्न सकिने भएको छ। १५ मेगावाट क्षमताको हेंवा ‘ए’ जलविद्युत आयोजना र २२ मेगावाटको तल्लो हेंवाखोला जलविद्युत आयोजनाबाट उत्पादित बिजुली थापाटार शवस्टेसनमा जोड्न सकिने भएको हो। हेंवा ‘ए’ बाट यसअघिनै विद्युत उत्पादन भइरेको छ भने तल्लो हेंवा उत्पादनको अन्तिम चरणमा छ।
करिडोरलाई तीन खण्डमा विभाजन गरी काम अघि बढाइएको थियो। इलामको गोदकदेखि फिदिमको थापाटार सम्मको दोस्रो खण्ड पूर्ण रुपमा सञ्चालनमा आएको आयोजना प्रमुख दिपेन्द्रराज द्धिवेदीले जानकारी दिए। गोदक फिदिम खण्ड मंगलबार साँझ पाँच बजे र दमक लखनपुर, झापा फिदिम खण्ड छ बजे चार्ज गर्न सफल भएको हो। ‘परीक्षण सफल भएपछि व्यवसयिक रुपमा सञ्चालनमा आएको छ,’ द्धिवेदीले भने, ‘ तेस्रो खण्ड पनि चाँडै सञ्चालनमा आउँछ।’
४२.८८ किलोमिटर लम्बाई रहेको दोस्रो खण्डमा एक सय २६ वटा टावार राखिएको छ। यो खण्डको सबै काम सकिएपछि प्रशारण लाइन पूर्ण रुपमा सञ्चालनमा आएको हो। फिदिमदेखि अमारपुरको दुवीचौरसम्मको तेस्रो खण्डको काम पनि अन्तिम चरणमा पुगेको द्धिवेदीले जानकारी दिए।
आगामी असार महिनासम्ममा तेस्रो खण्ड पनि सञ्चालनमा ल्याउने तयारी छ। झापाको लखनपुरदेखि सुरु गरिएको प्रशारण लाइन पाँचथरको अमरपुरसम्म विस्तार हुने छ। तेस्रो खण्डमा तार टाँग्ने र बाँकी रहेको केही पोल गाड्ने काम भइरहेको छ। प्रशारण लाइनमा जम्मा दुई सय ६१ वटा पोल गाड्नुपर्ने हुन्छ।
झापाको लखनपुरदेखि इलामको गोदक सम्मको ३५ किलोमिटर प्रशारण लाइन २०७२ सालदेखि नै सञ्चालनमा आएको थियो। निर्धारित समयमा काम नसकिएपछि पाँच पटक थपिएको समयमा प्रशारण लाइनको दोस्रो खण्डले पूर्णता पाएको हो। तीन करोड १० लाख अमेरिकी डलरको लागतमा नेपाल सरकार, विद्युत प्राधिकरण र विश्व बैंकको सहयोगमा आयोजना निर्माण गरिएको हो।
प्रतिक्रिया दिनुहोस !
