भोजपुर: मंगलबार दिउँसो प्रहरीसँगको मुठभेडमा घाइते भएका नेत्रविक्रम चन्द विप्लवका कार्यकर्ताको उपचारको क्रममा मंगलबार राति मृत्यु भएको छ। टेम्केमैयुङ गाउँपालिका-१, तिम्माको धोद्रे जंगलमा प्रहरी र विप्लव कार्यकर्ताबीच भएको मुठभेटमा प्रहरीको गोली लागि षडानन्द नगरपालिका- २ कुदाककाउलेका ३२ वर्षीय तिर्थराज घिमिरेको उपचारका क्रममा मृत्यु भएको हो।
घाइते घिमिरेको उपचारका क्रममा बुधबार बिहान करिब साढे ३ बजेतिर धरानस्थित वीपी कोईराला स्वास्थ्य विज्ञान प्रतिष्ठानमा मृत्यु भएको प्रमुख जिल्ला अधिकारी नुरहरि खतिवडाले जानकारी दिए।
उपचारका लागि एम्बुलेन्सबाट मंगलबार साँझ धरान लैजाने क्रममा भोजपुर नगरापालिका- १० भैसीपंखाको भीरको सडकमा ढुङगा झरेर बाटो अवरोध भएपछि उनलाई समयमै धरान पुर्याउन समस्या भएको थियो।
प्रजिअ खतिवडाले घिमिरेको धरानमा उपचारका क्रममा मृत्यु भएको जानकारी दिए।उनले भने, ' घटनास्थलबाट सडकसम्म घाइते घिमिरेलाई बोकेर ल्याउन प्रहरीलाई पाँच घण्टा लागेको थियो।अस्पताल पुर्याउन ढिला भएका कारण उनको मृत्यु भएको हुनसक्छ।' घिमिरेको साथमा हतियारसमेत फेला परेको प्रहरीको दाबी छ।
सो ठाउँ छिनामखु र खोटाङ्गको केपलासगढी गाउँपालिकाको सीमा क्षेत्रमा पर्दछ।कार्यकर्ताले प्रहरीमाथि फायर खोलेको र जवाफी कारबाहीमा घिमिरेलाई गोली लागेको प्रजिअ खतिवडाको भनाई छ।
दर्जनौंको समूहमा रहेका हतियारधारीले त्यहाँबाट जंगलको बाटो हुँदै भागेको बताइएको छ। विगत केहि दिनदेखि भोजपुर, खोटाङ्ग र सोलुखुम्बुको सीमा क्षेत्र मैयुङ्ग, दोभानेमा विप्लवका हतियारधारी लडाकु रहेको प्रहरीले सूचना पाएको जनाएको छ । सोहि सूचनाको आधारमा प्रहरी, सशस्त्र प्रहरीलगायतको टोलीले चारैतिरबाट घेरा हालिको थियो।
प्रतिक्रिया दिनुहोस !
