अदालतले छोड्नासाथ विप्लवका कार्यकर्ता पक्राउ, पक्राउपछि पार्टी परित्याग !
जेठ १३, २०७६ सोमबार १९:५७:०
परासी : जिल्ला अदालतले धरौटीमा छाडेका विप्लव समूहका पश्चिम नवलपरासी जिल्ला सदस्य रमेश बस्याललाई प्रहरीले सोमबार लगत्तै पक्राउ गरेको छ ।
बस्याललाई जिल्ला अदालतले ४० हजार धरौटीमा छाडेको थियो । जिल्ला न्यायाधीश हेमबहादुर सेनको इजलाशले बस्यालसँगै जिल्ला इन्चार्ज सुमन उपनामबाट चिनिने गंगा ज्ञवाली र जिल्ला सदस्य अलगु थारुलाई जनही ४० हजार धरौटी माग गरेको थियो ।
ज्ञवाली र थारुलाई धरौटी रकम बुझाउन नसकेपछि पुर्पक्षका लागि थुनामा पठाइएको छ । बस्याललाई भने धरौटी बुझाएर छुटेलगत्तै सादा पोशाकका प्रहरीले अदालतको मुल गेट अगाडिबाट पक्राउ गरेको हो ।
बर्दघाट नगरपालिका–४ बस्ने बस्याल एक महिनाअघि घरबाटै पक्राउ परेका थिए । यस्तै जिल्ला इन्चार्ज ज्ञवाली गत चैत ११ गते र थारु चैत २२ गते पक्राउ परेका थिए । उनीहरु माथि ‘आगो लगाएको’ र ‘संगठित अपराध’मा प्रहरीले मुद्दा चलाएको थियो ।
पक्राउ परेपछि 'पार्टी परित्याग'
बस्याल र थारुले सोमबार नै एक विज्ञप्ती प्रकाशित गरी आफूहरुले उक्त पार्टी परित्याग गरेको जनाएका छन् । उनीहरुद्वारा जारी छुट्टाछुट्टै जारी विज्ञप्तीमा आजैका मितिदेखि उक्त पार्टीको शुभचिन्तक, समर्थक र साधारण सदस्यसमेत नरहने गरी पार्टी परित्याग गरेको उल्लेख गरेका छन् ।
बस्यालमाथि केही विषयमा अनुशन्धान गर्नुपर्ने भएकाले पक्राउ गरिएको जिल्ला प्रहरी उपरीक्षक राजेन्द्रप्रसाद भट्टले बताए ।
प्रतिक्रिया दिनुहोस !
