भोजपुर : भोजपुरको षडानन्द नगरपालिका–९ किमालुङका ३५ वर्षीय सुरेश भनिने मानबहादुर तामाङको मृत्यु रहस्यमय बन्दैगएको छ । आत्महत्या गरिएका भनिएका तामाङको हत्या गरिएको आरोप उनकै सासू र श्रीमतीमाथि लागेपछि रहस्यमय बनेको हो ।
षडानन्द नगरपालिका–३ खार्तम्छास्थित ससुराली घरमा गत शनिबार विषादी सेवन गरी आत्महत्या गरेको भनिएका तामाङको सिरानीले थिचेर हत्या गरेको आरोप लगाइएको हो ।
तामाङ परिवारले विषादी सेवन गरेको नभइकन श्रीमतीसँग मिलेर ससुराली पक्षले हत्या गरेको आरोप लगाएको छ । दाजु चक्रबहादुरले किटानी जाहेरी दिएपछि प्रहरीले मानबहादुरकी श्रीमती २२ वर्षीया कविता तामाङ, सासू ४५ वर्षीया पम्फा तामाङ र भान्जा भनिने ३३ वर्षीय पूर्ण तामाङलाई पक्राउ गरेर अनुसन्धान थालेको छ ।
धरान घर भएका पूर्ण मृतकको ससुराली घरमा मिस्त्री काम गर्दैआएका व्यक्ति हुन् । मृतकको भान्जा भन्दै प्रहरीलाई झुक्याउने गरेको र घटनामा उनको पनि संलग्नता रहेको आशंकामा पक्राउ गरेर अनुसन्धान सुरु गरिएको प्रहरी निरीक्षक पाण्डव राजवंशीले बताए ।
शवको धरानस्थित बिपी कोइराला स्वास्थ्य विज्ञान प्रतिष्ठानमा पोस्टमार्टम गरिएपछि परिवारका सदस्यले मंगलबार अन्त्यष्टी गरे । घटनामा संलग्नताको आशंका गरिएका पूर्ण तामाङले आफ्नै मामा भन्दै मृतकका श्रीमती र सासूलाई पनि धरान लैजानुपर्ने भन्दै आफूहरुलाई झुक्काएको राजवंशीको भनाइ छ ।
पीडित पक्षसँग बुझ्दा कुनै नाता सम्बन्ध नभएको पाइएपछि पक्राउ गरिएको बताइएको छ । घटनाको प्रकृति हेर्दा हत्या नै जस्तो देखिएको र पक्राउ गरिएकाहरुले शंकास्पद व्यवहार देखाइरहेका कारण संवेदनशील रुपमा अनुसन्धान सुरु गरिएको डीएसपी केशवकुमार थेवेले बताए ।
‘शवको पोस्टमार्टम भए पनि रिपोर्ट आइसकेको छैन । घटनालाई सबै प्रमाणसँग जोडेर अनुसन्धान गर्ने काम भइरहेको छ,’ उनले बताए । पोस्टमार्टम रिपोर्टले पनि विषादी सेवनका कारण मृत्यु भएको हो वा अर्कै कारणले घटना भएको हो भन्ने प्रष्ट पार्ने डीएसपी थेवेको भनाइ छ ।
मृतकका दाजु चक्रबहादुरले भाईको शव भेटिएको ओछ्यान छेउमै विषादीको बट्टा भेटिएको भए पनि धेरै पहिले प्रयोग गरिसकेको अवस्थामा रहेको र त्यसबाट विषादीको कुनै गन्ध नआएको बताएका छन् ।
घटनाको प्रकृति हेर्दा निदाएको मौका छोपी सिरानीले घाँटी थिचेर हत्या गरिएको धनबहादुरको आरोप छ । प्रहरीका अनुसार मृतककी श्रीमती कविताले गत शुक्रबार बेलुकी खाना खाइ साथै मोबाइलमा फिल्म हेर्दै बसेको र तल्लो गाउँतिर पुगेर राति करिव १० बजे फर्किँदा श्रीमान मृत भेटिएको बताएकी छन् ।
प्रतिक्रिया दिनुहोस !
