नेकपा कार्यकर्तालाई आचरण सुधार्न नेता रावलको निर्देशन
जेठ २९, २०७६ बुधबार १८:२:०
बझाङ : नेकपाका नेता भीम रावलले कम्युनिष्टहरुले आफ्नो आचरण सुधार गर्नुपर्ने बताएका छन् । नेकपाको पार्टी एकतापछि जिल्ला कमिटीलाई सपथग्रहण गराउन बझाङ आएका नेता रावलले यस्तो बताएका हुन् ।
सपथग्रहणपछि बुधबार मन्तब्य दिने क्रममा उनले कम्युनिष्ट हँु भन्ने तर आचरण र व्यवहार कम्युनिष्ट जस्तो नभएकाले कम्युनिष्टप्रति धारणा गलत हुँदैगएको टिप्पणी गरेका थिए ।
‘हामी जहिले पनि सर्वहारा, गरिब बिपन्न तथा पछाडि परेका वर्गकै हक, हितका लागि भनेर भाषण गर्दै हिँड्यौँ तर हाम्रो व्यवहार र कार्यशैलीले अझै गरिब निमुखा असहायका लागि काम गर्न सकेन,’ नेता रावलले भने ।
कम्युनिष्ट भन्दै जाने तर पछिल्लो समयमा भ्रष्टाचारबाट अकूत सम्पत्ति आर्जन गर्ने क्रम बढेकोमा पनि उनले असन्तुष्टि पोखे । बझाङमा नेकपाको नयाँ जिल्ला कमिटीमा पूर्व एमाले र माओबादीबीच ६०÷४० को भागवण्डा गरी एकता भएको हो ।
एक सय ३५ सदस्यीय जिल्ला कमिटीमा पूर्व एमालेबाट ८० जना र माओवादीबाट ५५ सदस्य छन् । जिल्ला अध्यक्ष भने पूर्व माओवादीका युवा नेता मिन कुंवर छनोट भए ।
प्रतिक्रिया दिनुहोस !
