उदयपुर : उदयपुरमा चट्याङले लागेर १७ लाख बढिको क्षति भएको छ। शनिबार बिहान ४ बजे वर्षातसँगै परेको चट्याङ लागेर बेलका नगरपालिका २ त्रिवेणीटोलका चार घरपरिवारमा क्षति पुगेको हो ।
चट्याङले सबैभन्दा बढि जोगेन्द्र उराउ घरमा क्षति पुगेको छ । उनको काठको घर, अन्नपात, भाँडावर्तन, ५ वटा हाँस, १५ वटा कुखुरा गरेर १० लाख रुपैयाँको क्षति भएको एसपी मगरले बताए ।
त्यसैगरी मानबहादुर कार्कीको घर र सामान गरी ५ लाख, मनकुमार राईको भैसी १, राँगा १ र अन्य गरी १ लाख ९० हजार र दिपा राईको सोलार प्यानल जलेर नष्ट भएको मगरले बताए । बिहानपख सुतिरहेको अवस्थामा एक्कासी चट्याङले घर, गोठमा हान्दा पूर्णरुपले जलेर नष्ट भएको हो ।
घरमा आगलागी हुनसाथ सपरिवार बाहिर निस्किएर ज्यान जोगाउन सफल भएको पीडितहरुले बताएका छन् । पीडित परिवारलाई बेलका नगरपालिकाले तत्काल राहत उपलब्ध गराएको छ । नगरपालिकाका मेयर दुर्गाकुमार थापालगायतको टोली बिहानै घटनास्थलमा पुगि घर, ग्वाली, चौपाए गुमाएका पीडित परिवारको जानकारी लिँदै खाद्यान्न लगायतका राहतका सामग्री उपलब्ध गराएको हो ।
प्रतिक्रिया दिनुहोस !
