घुमाउने बहानामा छोरीमाथि बलात्कार र अप्राकृति मैथुन गर्ने सानोबाबु पक्राउ

ललितपुर : गोदावरी नगरपालिकाको एक विद्यालयको संरक्षणमा रहेकी १३ वर्षीया बालिका आफ्नै सानोबाबुबाट बारम्बार बलात्कृत भएको खुलेको छ।
 
गत शनिबार पनि सानोबाबुले गोदावरीको एक होटलमा अप्राकृतिक मैथुन गर्न लगाएपछि सानुबाबुको कर्तुत बाहिर आएको हो। काठमाडौं बाहिर घर भएकी बालिका विद्यालयको होस्टलमा बस्दै आएकी थिइन्। 

बालिकाले गत शनिबारको घटना साथीलाई बताएकी थिइन्। उक्त कुरा विद्यालयका शिक्षकको कानमा पुगेको थियो। शिक्षकलाई पनि सानोबाबुको क्रियाकलापमा शंका लागेपछि बालिकासँग सोधपुछ गर्दा गोदावरीस्थित न्यु हिमालयन रेष्टुरेन्ट एण्ड गेष्ट हाउसमा लगेर मिठाइलगायत अन्य खानेकुरा खुवाई अप्राकृतिक मैथुन गर्न लगाएको बालिकाले बताएकी थिइन्। 

महानगरीय प्रहरी वृत्त सातदोबाटोका प्रमुख गौतम मिश्रका अनुसार बालिकाले गत दसैं र चैत्र महिनामा पनि विभिन्न प्रलोभनमा जबरजस्ती बलात्कार गरेको बताएकी छन्। 

कसुरदार उनका सानीआमाका श्रीमान हुन्। उनी विभिन्न स्थान परिवर्तन गरेर लुक्दै आएका थिए। उनलाई प्रविधिको सहयोगमार्फत् घेराबन्दी गरेर जेठ ३० गते गोदावारीको किटिनी भन्ने ठाउँबाट पक्राउ गरिएको मिश्रले जानकारी दिए। 

पक्राउ गरेपछि उनले आरोप स्वीकार गरेका छन्। सात दिन म्याद थप गरी जबरजस्ती करणी अन्तर्गतको मुद्दामा अभियुक्तमाथि अनुसन्धान सुरु भएको गौतमले बताए।