विप्लव समूहले गाउँपालिका अध्यक्षको कार्यकक्षमा राखेको बम १२ घण्टापछि निस्क्रिय
असार १०, २०७६ मंगलबार २०:३:०
जाजरकोट : जरकोटको बारेकोट गाँउपालिकाका अध्यक्ष महेन्द्र शाहको लिम्सास्थित कार्यकक्ष अगाडि राखिएको सुतली बम १२ घण्टापछि नेपाली सेनाले डिस्पोज गरेको छ । सदरमुकाम खलंगा र जाजरकोट–डोल्पा सडक निर्माण कार्यदलको मनमइबाट गएको नेपाली सेनाको टोलीले बम निस्क्रिय पारेको हो ।
सेनाको ज्वाला दल गणका क्याप्टेन जयराम घिसिङ्गको नेतृत्वमा ७ घण्टा पैदल हिँडेर गएको टोलीले बम राखेको करिब १२ घण्टापछि निस्क्रिय पारेको गाँउपालिका अध्यक्ष महेन्द्र शाहले बताए । बम निकै शक्तिशाली रहेको सेनाले जनाएको छ ।
नेत्रविक्रम चन्द्र ‘विप्लव’ नेतृत्वको नेपाल कम्नियुस्ट पार्टीले आयोजना गरेको नेपाल बन्दलाई लक्षित गरी उनीहरुले नै त्रास फैलाउन उक्त सुतली बम राखिएको हुन सक्ने सुरक्षा निकायको भनाइ छ ।
बम हो वा होईन भन्ने छुट्याउन नसक्दा ईलाका प्रहरी कार्यालय रामीडाँडाको प्रहरी टोलीले उक्त शंकास्पद वस्तु बम हो वा होइन भन्ने छुट्याउन नसकेपछि सेनालाई पठाइएको प्रमुख जिल्ला अधिकारी ललित बस्नेतले बताए ।
बन्दले जाजरकोटको जनजीवन प्रभावित भएको छ । यातायातका साधन चल्न सकेका छैनन् । शिक्षण संस्था, बजार, कलकारखाना बन्द भएका छन् । लामो तथा छोटो दुरीका सवारी साधन नचल्दा मानिसहरु गन्तब्यमा पुग्न सकिरहेका छैनन् ।
सोमबार बसेको जिल्लास्थित सुरक्षा समितिको बैठकले बन्दको क्रममा अप्रिय घटना हुन नदिन सुरक्षा निकायको गस्ती बढाउने, शंकास्पद मानिसको निगरानी र खानतलासी गर्ने लगायतका निर्णय गरेको प्रजिअ बस्नेतले बताए ।
प्रतिक्रिया दिनुहोस !
