लन्डन : पाकिस्तानले आईसीसी एकदिवसीय विश्वकप क्रिकेटको सेमिफाइनल पुग्ने सम्भावना जीवितै राखेको छ । विश्वकपअन्तर्गत शनिबार भएको खेलमा अफगानिस्तानलाई तीन विकेटले पराजित गर्दै पाकिस्तानले अन्तिम चारमा पुग्ने सम्भावना जीवितै राखेको हो । विश्वकपमा आठ खेल खेलिसकेको पाकिस्तानले नौ अंक बनाएको छ । पाकिस्तान अंक तालिकाको चौथो स्थानमा पनि उक्लिएको छ ।
अफगानिस्तानले दिएको २२८ रनको लक्ष्य पछ्याएको पाकिस्तानले ४९.४ ओभरमा सात विकेट गुमाएर पूरा गर्यो । पाकिस्तानका लागि इमाद वासिमले अविजित ४९ रन बनाए । उनले ५४ बलमा पाँच चौका हिर्काए ।
यसैगरी बाबर आजमले ४५, इमाम उल हकले ३६, हरिस सोहेलले २७, मोहम्मद हफिजले १९, कप्तान सरफराज अहमदले १८ र वाहव रियाजले १५ रन बनाए । अफगानिस्तानका मुजीवउर रहमान र मोहम्मद नाबीले दुई÷दुई विकेट लिए । यसैगरी रासिद खानले एक विकेट हात पारे ।
विश्वकपमा अब पाकिस्तानले समूह चरणको अन्तिम खेलमा बंगलादेशको सामना गर्नेछ । यसैगरी अफगानिस्तानले वेस्ट इन्डिजसँग प्रतिस्पर्धा गर्नेछ । अफगानिस्तानले भने खेलेका आठै खेलमा पराजय बेहोरेको छ ।
यसअघि लिड्सको हेडिङ्लीमा टस जितेर पहिले ब्याटिङ गरेको अफगानिस्तानले पूरै ५० ओभर खेल्दै नौ विकेट गुमाएर २२७ रन बनाएको थियो । लगातार विकेट गुमाउँदा अफगानिस्तानले मध्यम योगफल मात्र बनाउन सक्यो ।
अफगानिस्तानका लागि अस्घर अफगान र नजिबुल्लाह जाडरनले समान ४२ रन बनाए । यसैगरी रमात साहले ३५, इक्रम अली खिलले २४, समिउल्लाह सिनवारीले १९, मोहम्मद नाबीले १६ र कप्तान गुलबद्दिन नइबले १५ रन बनाए ।
अफगानिस्तानलाई विशाल योगफलबाट रोक्न पाकिस्तानका युवा बलर साहिन अफ्रिदीले चार विकेट लिए । यसैगरी इमाद वासिम र वाहव रियाजले दुई/दुई तथा सदाव खानले एक विकेट हात पारे ।
प्रतिक्रिया दिनुहोस !
