लन्डन : आईसीसी एकदिवसीय विश्वकप क्रिकेटअन्तर्गत आइतबार आयोजक इङ्ल्यान्ड र भारतबीच प्रतिस्पर्धा हुँदैछ । यो खेल एजबास्टन मैदानमा नेपाली समयअनुसार दिउँसो ३ :१५ बजेदेखि सुरु हुनेछ । जारी विश्वकपमा यी दुवै टोली उपाधि दाबेदार हुन् ।
दुई पटकको विश्वकप च्याम्पियन भारत जारी विश्वकपमा अपराजित छ । भारत आयोजक इङ्ल्यान्डविरुद्ध पनि आफ्नो अपराजित यात्रा कायम राख्न चाहन्छ । यसैगरी इङ्ल्यान्ड पनि बलियो भारतलाई रोक्दै सेमिफाइनलमा स्थान बनाउने दाउमा छ ।
भारत र इङ्ल्यान्ड पहिलो संस्करणदेखि नै विश्वकपमा सहभागी बन्दै आएका छन् । भारतले दुई संस्करणको उपाधि जितिसकेको छ । इङ्ल्यान्डले भने विश्वकप अहिलेसम्म जित्न सकेको छैन । भारतले सन् १९८३ र सन् २०११ को विश्वकप उपाधि जितेको थियो । जारी विश्वकपमा हालसम्म ६ खेल खेलेको भारत अपराजित टोली हो । पाँच खेल जितेको भारतको एक खेल भने वर्षाका कारण रद्द भएको थियो । भारतले तालिकामा ११ अंक बनाएको छ । आइतबार हुने खेल पनि जितेर भारत आफ्नो अपराजित यात्रा कायम राख्न चाहन्छ । भारत बलियो र सन्तुलित टोलीका रूपमा देखिएको छ । भारतको सबै पक्ष उत्कृष्ट छ । भारतीय टोलीसँग क्षमतावान् ब्याट्सम्यान र बलरको कमी छैन । अनुभवी बलर भुवनेश्वर कुमार पनि चोटमुक्त भएर खेलमा फर्किएपछि भारतको मनोबल थप उच्च छ ।
यसैगरी इङ्ल्यान्ड भारतलाई हराएर सेमिफाइनलमा आफ्नो स्थान बलियो बनाउले लक्ष्यमा छ । इङ्ल्यान्डले सात खेल खेलिसकेको छ । इङ्ल्यान्डले चार खेलमा जित र तीन खेलमा हारको नतिजा निकालेको छ । इङ्ल्यान्डले तालिकामा आठ अंक बनाएको छ । जारी विश्वकपमा घरेलु टोलीलाई पाकिस्तानले १४ रन र श्रीलंकाले २० रनले हराएका थिए । अघिल्लो खेलमा इङ्ल्यान्ड साविक विजेता अस्ट्रेलियासँग ६४ रनले पराजित भएको थियो । यद्यपि यस विश्वकपमा आयोजक इङ्ल्यान्ड पनि सशक्त देखिएको छ । इङ्ल्यान्डको ब्याटिङ, बलिङ र फिल्डिङ सबै उत्कृष्ट छ । घरेलु मैदान र समर्थकको साथ पनि इङ्ल्यान्डलाई छ । त्यसैले भारतविरुद्ध इङ्ल्यान्डले उच्च स्तरको प्रदर्शन गर्ने योजना बनाएको छ ।
यसअघि एकदिवसीय क्रिकेटमा यी दुई टोलीको भिडन्तमा भारत बलियो देखिएको छ । यी दुई टोलीबीच अहिलेसम्म ९९ वटा एकदिवसीय खेल भएका छन् । भारतले ५३ खेलमा जित हात पारेको छ । इङ्ल्यान्डले भने ४१ खेल जितेको छ । दुई खेल बराबरीमा सकिएको छ भने तीन खेल अनिर्णित भएको छ । एकदिवसीय विश्वकपमा यसअघि यी दुई टोलीबीच सात पटक भिडेका छन् । दुवै टोलीले तीन÷तीन खेल जितेका छन् भने एक खेल अनिर्णित बनेको थियो । त्यसैले लयमा रहेको भारत र बलियो आयोजकबीचको भिडन्तले आम क्रिकेट दर्शकलाई भरपूर मनोरञ्जन दिनेछ ।
आजको खेल
इङ्ल्यान्डविरुद्ध भारत
एजबास्टन (दिउँसो ३ :१५ बजे)
एकदिवसीयमा दुई टोली
कुल : ९९ खेल
भारत विजयी : ५३ खेल
इङ्ल्यान्ड विजयी : ४१ खेल
अनिर्णित : ३ खेल
बराबरी : २ खेल
विश्वकपमा दुई टोली
कुल : ७ खेल
भारत विजयी : ३ खेल
इङ्ल्यान्ड विजयी :३ खेल
अनिर्णित : १ खेल
प्रतिक्रिया दिनुहोस !
