किर्ते मुद्दामा कृषि बैंकका पूर्व प्रमुखसहित २६ जना दाेषी : १ वर्ष कैद, २ करोड ४४ लाख ५० हजार विगो

ताप्लेजुङ : ताप्लेजुङ जिल्ला अदालतले सरकारी कागजात किर्ते मुद्दामा २६ जनालाई दोषी ठहर गरेको छ ।

कृषि विकास बैंक ताप्लेजुङ शाखाका तत्कालिन प्रमुख गणेश खतिवडासहित २६ जनालाई एक वर्ष कैद र विगोको २५ प्रतिशत तिर्नुपर्ने फैसला गरेको हो ।

उनीहरुले सरकारी कागजातलाई किर्ते गरी भीरपाखालाई प्लटिङ जग्गा देखाउँदै कृषि विकास बैंक लिमिटेड ताप्लेजुङ शाखाबाट कर्जा प्रवाह गरेका थिए । जिल्ला न्यायाधीष कृपासुर कार्कीको ईजलासले आइतबार एकैदिन सोसँग सम्बन्धित ३८ थान मुद्दाको सुनुवाई गर्दै उक्त फैसला गरेका हुन् ।

जिल्ला अदालतका श्रेष्तेदार केदार प्रसाद गौतमका अनुसार बैकका तत्कालिन शाखा प्रमुख गणेश खतिवडा, लेखापाल हरिशंखर न्यौपाने, कर्मचारी भिमप्रसाद आर्चाय र जग्गाधनी पदमकुमारी नुगोलाई मुख्य दोषी ठहर भएका छन् ।

२०७५ साल साउन ११ गते १८ थान तथा २०७५ कार्तिका ९ मा २० थान मुद्दा दर्ता भएको थियो । अन्य सबैलाई एक वर्ष कैद र विगोको २५ प्रतिशत फैसला गरेको छ । अदालतले मुख्य दोषी ठहर गरेको प्रमुख खतिवडा, न्यौपाने आर्चाय र नुगोलाई भने प्रत्येकको २० प्रतिवादीको विगोको २५ प्रतिशत जरिवाना ठहर्ने फैसला गरेको श्रेष्तेदार गौतमले बताए ।

कैद सजाय भने सबैलाई एक वर्ष तोकेको छ । अदातलले श्याम श्रेष्ठ, ललितकुमारी गुरुङलाई १२ लाख विगोमा २५ प्रतिशत ठहर गरेको हो । प्रतिवादी यमुना शिवालाई १४ लाख २५ हजार मनिषा सुब्बालाई ६ लाख, नारायणसिंह बोखिमलाई ९ लाख, बमबहादुर र दुर्गा लिम्बूलाई १३ लाख २५ हजार, तारादेवी बोगटीलाई १९ लाख ५० हजार, विनु थुलुङ लिम्बुलाई ८ लाखको विगो ठहर्ने फैसला गरेका छ ।

यस्तै सरिता लिम्बू र गौमती लिम्बूलाई १०—१० लाख प्रमिला गुरुङलाई १५ लाख मैया थापालाई१२ लाख, शान्ता काङवा, अनिता जोगी, राममाया बेघा, अरुण कार्की र सुनिता लिम्बूलाई ८—८ लाख र ईन्दिरा खवासलाई २४ लाख विगो सजाय सुनाएको हो ।

यस्तै सुमित्रा लिम्बूलाई ६ लाख संगीता मादेनलाई ३० लाख, रमेशकुमार राईलाई १८ लाखको विगो सजाय सुनाएको बताइएको छ । मुद्दामा पदमकुमारी कर्जा प्रवाहमा मिलेमतो गरेर हिनामिना गराउने मुख्य आरोपी हुन् । उनले कर्मचारीको मिलेमतोमा जग्गा किनेबेच गर्ने गराउने बहानामा कागजी रुपमा जग्गा बंैकमा राखेर ऋण हिनामिना गर्ने गराउने गरेकी थिइन् ।