दोलखा : दोलखा बजारको नयाँ कालोपत्रे गरिएको सडकमा स्कुटर सिक्ने क्रममा दुर्घटनामा २ जना घाइते भएका छन्। शुक्रबार दिउँसो भीमेश्वर नगरपालिका-२ चारथली भन्ने स्थानमा स्कुटर सिकाउने क्रममा दुर्घटना हुँदा स्कुटर धनी कालिन्चोक गाउँपालिका-५ का ३२ वर्षीय सहदेव खड्का गम्भीर घाइते भएको दोलखा प्रहरीले जनाएको छ।
नयाँ कालोपत्रे गरिएको सडकमा प्रदेश नं.३-०२-००१प ५४५९ नम्बरको स्कुटर सिक्ने क्रममा अनियन्त्रित भई सडकबाट तल खसेर रुखमा अड्किएको थियो। गम्भीर घाइते भएका खड्काको उपचारका लागि हेलिकप्टरमार्फत काठमाडौं पठाइएको दोलखा प्रहरी प्रवक्ता प्रहरी निरीक्षक रेशम बोहराले जानकारी दिए।
स्कुटर सिक्ने जिरी नगरपालिका-१ श्यामाकी १८ वर्षीया सुष्मा बुढाथोकीको अनुहार, दाहिने घुँडा, दुबै हातमा चोट लागेको छ। उनको प्राथमिक स्वास्थ्य केन्द्र चरिकोटमा उपचार भइरहेको प्रहरीले जनाएको छ।
प्रतिक्रिया दिनुहोस !
