पानी पिउने बहानामा बालिकालाई बलात्कार प्रयास गर्ने पक्राउ
असार २५, २०७६ बुधबार १९:५९:०
राजविराज : पानी पिउने बहानामा घरमा छिरेर बलात्कार प्रयास गरेको आरोपमा सप्तरीमा एकजना पक्राउ परेका छन् ।
सडक मजदुरीको रुपमा काम गर्दैआएका सप्तरीको बोदे बर्साइन नगरपालिका–३ का ३५ वर्षीय मो. मुस्ताकलाई प्रहरीले बुधवार पक्राउ गरेको हो । गत सोमबार घरमा कोही नभएका बेला पानी पिउने बहानामा ११ वर्षीया बालिकालाई बलात्कार प्रयास गरेको आरोप उनीमाथि लागेको छ ।
पीडितकी आमाले दिएको उजुरी र पीडितको वयानपछि आरोपितलाई पक्राउ गरी जबरजस्ती करणीको उद्योगमा उजुरी दर्ता गरिएको इलाका प्रहरी कार्यालय, कल्याणपुरका प्रहरी निरीक्षक विष्णुप्रदिप बस्यालले जानकारी दिए ।
आरोपितले घरमा कोही नभएको देखी कपडा खोली बलात्कार प्रयास गर्न खोजेको पीडितले प्रहरीसमक्ष वयान दिएको प्रहरीले जनाएको छ । इलाका प्रहरी कार्यालय कल्याणपुरले जबरजस्ती करणी उद्योगको उजुरी दर्ता गरी थप अनुसन्धान कार्य अगाडि बढाएको जनाएको छ ।
प्रतिक्रिया दिनुहोस !
